BUENOS AIRES (AFP).- Prokurador general di Argentina ayera a solisitá na korte Supremo di Hustisia pa oumentá for di seis pa 12 aña di prizòn e kastigu pa e eks-presidente Cristina Fernandez de Kirchner, kondená den dos instansia pa delitonan di korupshon.
E eks-mandatario peronista, di 72 aña, a keda sentensiá den promé instansia den 2022 i den apelashon den 2024 na seis aña di prizòn. E sentensia mas aleu ta prohibié pa bida largu tuma parti na polítika i esei pa motibu di “atministrashon froudulento” den dunamentu di trabounan riba vianan públiko durante su añanan komo presidente (2007-2015).
Dia 31 di mart, Kirchner a apelá e kondena dilanti e tribunal máksimo di Argentina, ku promé di trata e kaso a solisitá opinion di Eduardo Casal, hefe di tur fiskal dje pais i fiskal dilanti di Korte supremo.
Den un rapòrt di 13 página na kua AFP a haña akseso, Casal a pidi pa tambe kondená Kirchner pa delito di “asosiashon ilisito” i pa dòbel e kastigu.
Ku e veredikto ei, e prokurador a apoyá e demanda ku e fiskal general a presentá na Korte di Apelashon ku a konfirmá e kondena di aña pasá.
Awor e huesnan di Korte Supremo ta den kondishon pa evaluá e kaso, ounke nan no ta mará na tempu pa pa duna un veredikto.
Den kaso ku rechasá e demanda Kirchner, e kondena lo keda manera e ta. Ku esei e lider di oposishon por pidi huisarrest debí na su edat.
