WILLEMSTAD.- E atleta di tiru Philip Elhage a logra su klasifikashon pa Weganan Olímpiko di Tokyo ku ta tuma lugá di 23 di yüli pa 8 di ougùstùs benidero. Elhage, kende for di 2016 ta kompitiendo pa Aruba, lo bai su di dos Weganan Olímpiko despues ku for di 2008 el a asistí na e weganan pero e tempu ei bou di bandera di Antia Hulandes.
Elhage siman pasá a risibí e bon notisia ku el a kai den e grupo di atletanan ku a klasifiká pa Hapon. E tabata na altura ku e ta bon posishoná riba ranking pa logra e klasifikashon, pero tabata na final di kompetensianan ku a tuma lugá siman pasá ku e konfirmashon a drenta.
Philip Elhage a duna di konosé na EXTRA ku ta for di 2017 e kompetensianan a kuminsá pa e siklo olímpiko aktual. Den 2018 tabatin kompetensia ku ya a habri kaminda pa su klasifikashon. A sigui bon den 2019, pero den 2020 pa motibu di pandemia di Corona e kompetensianan no a sigui. Ku esei, e último oportunidat pa klasifiká tabata resien, sea dor di gana un dje kopanan mundial òf Panamerikano. Un otro posibilidat ta e skor mínimo di 563 punto ku mester a tira pa bini na remarke. Komo ku no ta tur tiradó ku tira e skor ei por bai Weganan Olímpiko, e organisashon di tiru e ora ei ta husga pa region ken ta esnan ku mayor kantidat di punto. A base di esaki Elhage a gana su ‘ticket’ pa Tokyo.
Kompetensia di tiru ta konta ku diferente disiplina, kualnan ta: 10m. pistol di airu, 25m pistol standard i 50m free pistol. Pa Olimpiada ta 10 meter pistol di airu so ta konta.
Preparashon na Mexico
Philip Elhage su entrenadó ta un mehikano i el a kaba di regresá for di un ‘trainingscamp’ di 2 siman na Mexico. Ta e intenshon pa próksimamente e bolbe bai Mexico pa sigui ku su preparashon ku bista riba e Weganan di Tokyo.
Pa Philip Elhage e klasifikashon aki ta algu grandi. For di 2004 e ta praktiká e deporte di tiru, pero den 2012 ku tur e problemanan ku a surgi ku Komité Olímpiko el a stòp. Na 2016 el a risibí oportunidat pa kompetí pa Aruba i esei a dun’é e smak pa kuminsá bèk di forma intensivo ku e deporte. Esaki ta enserá training 3x pa siman dos biaha pa dia riba kancha, pero tambe training ku ehersisio físiko for di djaluna pa djabièrnè. Gran parti dje training físiko ta konsistí di training pa tene balanse, segun e atleta a duna di konosé na EXTRA.
