No tin instansia pa referí alumnonan ku problema sosial emoshonal
WILLEMSTAD.- Seguridat pafó di skol ta un preokupashon grandi ainda. Prinsipalmente ken ta okashoná problema. Tin deskribí te ku kuantu meter pafó di skol, ainda un problema entre alumnonan ta responsabilidat di skol. Mas leu, ta konsiderá esaki áreanan públiko.
Segun direktor di Direktiva di Skolnan Katóliko (RKCS), Royla Pierre den práktika e distinshon aki no ta dje simpel ei. E ta mustra ku e peleanan ta tuma lugá hopi biaha den áreanan públiko manera na bòrchi di bùs kaminda muchanan ta topa otro. Esaki no ta motibu pa eksigí ku skol tin ku sanshoná un alumno pasobra e tin unifòrm di skol bistí.
“Ta pasobra e alumno e tin unifòrm di skol por identifiká si na unda e ta bai skol i ku por yega serka dje. E responsabilidat ta di nos tur.” Pierre ta mustra ku ta importante pa keda komuniká riba e tópiko aki i ta mustra ku e responsabilidat ta tantu den man di enseñansa komo hustisia, pero tambe di mayornan.
“Ta nos tur su responsabilidat pa eduká nos yunan bon i siña nan ku ta solushoná problemanan, sinta na mesa papiando en bes di bringa.” Den último lunanan promé ku fin di aña eskolar ku ta tras di lomba segun Pierre a bai mas mihó, den sentido ku no tabatin pelea entre alumnonan na sitionan públiko. E ta konsiente sinembargo ku ta algu chikí tin ku pasa ku muchanan por disidí di bai regla e asuntu na nan manera.
Pa e motibu aki e ta enfatisá ku mester keda pone atenshon na e situashon aki.
Guia
Pa loke ta guia pa alumno na skol, Pierre ta bisa ku direktivanan di skol a haña oido despues ku aña pasá den un reunion di Parlamento a duna un bista kla di situashonnan ku skolnan ta konfrontá debí na problemanan di kas ku e alumnonan ta sintá kuné. E ta bisa ku e echo ku a haña oido ta un komienso, pero mester traha awor riba solushon. “E situashon no a drecha, pero sinseramente den kuminsamentu mi tabatin e sentimentu ku no tabata tuma e situashon na serio òf tabata pensa ku ta sierto skol so tin e situashonnan aki, miéntras ku ta trata di un problema nashonal.”
Pierre: “Danki Dios ku Parlamento si a skucha nos gritunan i e direktivanan di skol por a trese situashonnan ku nan ta sintá kuné dilanti. Banda di problemanan sosial na kas tin otro problema serio manera uso di “vape” i alkohòl bou di alumnonan. Ta tur e tipo di kasonan aki trahadónan sosial mester atendé.
Segun Pierre pa siman ta bini 50 kaso nobo ku mester atendé miéntras ku ta algun ora pa siman e trahadó sosial tin pa dediká na e skol. Esaki no ta sufisiente. Pa e motibu aki ta duna atenshon solamente na e kasonan ku ta mas ekstremo.
Hopi di e problemanan ta di muchanan ku problema sosial emoshonal, Pierre ta splika mas aleu. No ta bira lomba pa e tipo di kasonan aki, pero e ta sinti falta di posibilidat pa referí e alumno pa e risibí ayudo mas spesialisá ku e mester. “E instansia aki no t’ei i konsekuentemente e alumno ta keda den skol ku su problema.”
Trahadó sosial ta purba di yuda mas mihó ku nan por, pero nan no ta kapasitá pa duna e ayudo mas spesialisá aki “E ta un problema di pais, kon di bèrdat por uni forsa entre ministerionan pa duna un man serio pa atendé ku e problemanan”, Pierre ta finalisá bisando.
