ÖREBRO, Suesia (AFP).- Komo diesdos persona, entre nan e aparente atakante, a muri tirá den un skol pa adultonan na Suesia, un insidente ku e promé minister a kalifiká komo “e pió tiroteo masivo di historia” dje pais. E insidente a tuma lugá Örebro, situá na 200 kilometer wèst di Stockholm.
E hefe di polis di Örebro, Roberto Eid Forest, a reportá ku “un desena di persona a muri”den e tiroteo den Campus Risbergska, un skol pa adultonan. No a presisá e kantidat di herido. E outor no ta konosí pa polis i no tin vínkulo ku ningun gèng.
Segun e kadena di televishon TV3, e supuesto outor dje atake ta un hòmber di 35 aña. E tabatin lisensia pa karga arma i no tabatin antesedente penal.
Outoridatnan no a divulgá ningun informashon adishonal relashoná ku e agresor òf su motibunan. Tampoko tokante identidat di esnan ku a pèrdè nan bida, ni si ta trata di alumnonan of dosentenan dje sentro.
Atakenan den skolnan na Suesia ta algu ku ántes masha poko a sosodé. Pero den último añanan e pais a bin ta esenario di tiroteo i atakenan relashoná ku violensia di gangnan, ku ta laga den kareda di dies morto kada aña.
E tiroteo ta keda investigá komo “intento di asesinato, atake premeditá i delito grave ku arma”.

LAGA UN KOMENTARIO

Please enter your comment!
Please enter your name here