Cleopa: Tin un desòrdu den gobernashon
WILLEMSTAD.- “Gobièrnu di Kòrsou ta den un desòrdu kompletu. E echo ku kandidato pa minister pa partido KEM, Jason Fullinck a hala atras ta un prueba di esaki. Partido MFK a manipulá i tuma pueblo di Kòrsou hasi pa mas ku 3 luna kaba.”
Asina kolaboradó di frakshon di MAN den parlamento, Eugene Cleopa ta trese dilanti. Fullinck pa motibunan personal a hala atras komo kandidato pa bira minister. Su nòmber a bai aden pa ‘screening’ for di komienso di sèptèmber despues ku KEM huntu ku miembro independiente di parlamento, Zita Jesus-Leito a yega na un akuerdo pa sostené e gabinete Pisas II.
Cleopa ta enfatisá ku ta for di momentu ku MFK a saka Partido Nashonal di Pueblo (PNP) for di gobernashon, no tabatin un mayoria mas pa e gabinete. Esaki pasobra e akuerdo ku a yega na dje ku KEM i Jesus-Leito ta a base di engaño, manipulashon i traishon, segun Cleopa.
“MFK, den personanan di promé minister, Gilmar ‘Pik’ Pisas i minister di Hustisia, Shalten Hato, tabata na altura di kiko tabata pasando rondó di lider polítiko di KEM, Michelangelo ‘Lo’ Martines. Nan a manipulá ku e situashon pasobra nunka tabata intenshon pa nombra niun otro minister banda di e tim di 5 minister di MFK ku ta tumando tur desishon den Konseho di Minister.”
De e forma aki, segun Cleopa, KEM a manipulá i rèk tempu pa nan so goberná. “Pronto Pisas lo entregá retiro tambe di su gabinete i pidi gobernadó pa disolvé parlamento pa yama elekshon nobo. Konsekuentemente gabinete demishonario Pisas II lo sigui goberná su so te ku elekshon na mart 2025.”
Cleopa ta mustra ku esaki no ta e manera pa abusá di e sistema demokrátiko di pais pa saka bentaha personal afó. E ta refutá e sistema di prosedé aki di parti MFK ku a kousa daño na nòmber di e kandidatonan pa bira minister ku e konsekuensia ku un di nan a hala atras. “Pueblo habri bosnan wowo, wak bon kiko ta pasando i komprondé e aktonan di traishon i engaño ku ta tumando lugá.”
E kandidatonan pa minister Fullinck i Raymond Jamanika, di parti di Jesus-Leito, ta wardando 3 luna kaba pa tende si nan por hura. Esaki tabata motibu pa hopi spekulashon pa algun siman kaba ku niun di dos kandidato no a pasa e ‘screening’. Formadó i alabes promé minister Pisas ta mantené un silensio hermétiko i no ta duna klaridat na komunidat di kiko ta pasando.
Úniko momentu ku Pisas a saka un komunikado tabata despues ku Martines a anunsiá e fecha ku ta bai hura e minister nobo di partido KEM. Pisas a indiká ku e proseso di “screening” no ta kla ainda i ku e kandidatonan no por hura miéntras ku esaki no kaba. No muchu despues, dia 5 di novèmber ta detené Martines riba sospecho di trafikashon di droga i labamentu di plaka.
portrèt:
…Eugene Cleopa…
