Segun Cleopa:
WILLEMSTAD.- E re-apertura di portanan di Post 5 a laga duda atras riba seriedat ku ta nesesario den gobernashon. E shou akí a “backfire” tambe riba promé minister Gilmar Pisas. No ta bèrdat ku a habri e refineria atrobe pero tabata simplemente pa durante sierto ora pa dia duna un akseso èkstra na trahadónan pa por subi e tereno, kolaboradó di frakshon di MAN, Eugene Cleopa ta deklará.
Den e kuadro akí ta refutá intentonan kontinuo di parti Pisas pa tilda entre otro partido MAN-PIN di ta ko-responsabel pa e echo ku refineria a sera su portanan. “Pero ta for di 2013 gobièrnu a tuma desishon ku no ta sigui ku PdVSA” Cleopa ta splika. Ku esaki Cleopa ke mustra ku e loke ku Pisas ta trese kada bes dilanti ta un mentira.
“Ora un polítiko ta gaña e no meresé haña sosten di niun hende.” Cleopa ta sigui splika ku ta abase di un dekreto gubernamental ku gobièrnu a pasa na 2012, a kuminsá e trayekto na 2013 pa buska operadó pa refineria Isla. “A kuminsá ku e trayekto akí bou di gobièrnu di Pueblo Soberano pasobra tabata sa ku na 2019 e kontrato ku refineria Isla lo a yega na su final.”
For di e tempu ei èks promé minister, Ben Whiteman, a bai Venezuela pa negoshá i firma un akuerdo pa konfirmá ku PdVSA lo kontinuá ku operashon di refineria Isla, Cleopa ta sigui bisa. “Pero Whiteman no a logra haña Venezuela asina leu pa firma un akuerdo asina. For di e momento akí a lanta un tim multidisiplinario ku a inisiá negoshashon ku e grupo di China, Guangdong Zhenrong.”
Despues ku e negoshashon ku e grupo Chines no a resultá den un kontrato definitivo pa operá refineria Isla a start negoshashon na 2016 ku e grupo Motiva. Segun Cleopa: “Rondó di e negoshashon akí a surgi un keho penal pa aktonan koruptivo ku lo a tuma lugá. Na 2019 a surgi e grupo Klesh ku segun Pisas no tabatin sèn pa operá e refineria pasobra a bin dilanti ku ke pasa e instalashonnan pa 1 florin loke a lidia na masha hopi komentario den polítika.”
Despues di Kesh, Cleopa ta sigui konta, a bini ku e grupo lokal CORC ku tampoko a resultá den algu konkreto. “Asina a hasi 13 aña ta buska un operadó pa refineria kaminda gabinete Pisas I i II tabata den gobernashon. Pues, e echo ku ta tira falta riba entre otro MAN-PIN no ta bèrdat.”
Cleopa ta bisa ku MAN no tabata den gobièrnu e tempu ei. Ta bin aserka ku na 2021 tabata MFK ku a primintí ku den 6 luna ta habri refineria atrobe. Otro mentira pasobra te awe e partido no por kumpli ku esaki, segun Cleopa. E ta mustra ku ni den pasado ni durante último 4 aña bou di gabinete Pisas II, PdVSA no a kumpli ku palabrashonnan ku a hasi ku nan.
Foto:
…Eugene Cleopa…
