WILLEMSTAD – Riba djadumingu mainta, Sentro Operashonal Marítimo di Wardakosta di Karibe Hulandes, a risibí un notifikashon relashoná ku dos piskadó den problema riba laman den besindario di Caracasbaai.
Segun e persona ku a duna e notifikashon, e dos piskadó nan lokal a kai den awa na momento ku nan boto a bòltu. Inmediatamente a manda un mensahe na tur barku den e área pa duna un man. Personal di e boto ‘Ocean Encounters’ ku tabata serka, a logra di saka e piskadónan for di awa. Un di e piskadó nan tabata rekerí di asistensia adishonal. Inmediatamente, personal di Ocean Encounters a kuminsá ku ehersisionan di reanimashon.
Entre tantu, organisashon di boluntario CITRO a ser informá di e kaso. Un di e barkunan di CITRO ku tabata asistí durante di e evento Open Water Swim, a yega den algun minüt na e barku di Ocean Encounters pa duna mas asistensia.
Akto nan di reanimashon a kontinuá huntu ku e personal di Ocean Encounters i di CITRO. Na dado momento a disidí di transportá e persona via e boto di CITRO i hibe Vissershaven na Caracasbaai. Un ambulans di Krus Kòrá tabata wardando riba yegada di e boto di CITRO pa asina risibí e persona.
Kuerpo Polisial a informá Wardakosta ku e persona a fayesé na kaminda pa CMC. Di parti di tur organisashon ku a yuda awe, nos ke deseá famia i amigunan di e mener hopi forsa durante di e momento difísil nan aki.
