WILLEMSTAD.- Ya pa algun aña kaba dirigentenan di atletismo a alertá ku mester bai kambia e pista den stadion Ergilio Hato. Esaki mirando ku e tabata bayendo atras di forma alarmante.
Último tempu e estado di e pista a bai mas atras, ku a pone ku dirigentenan mester a lapi sierto parti di e pista pa asina tòg por hasi uso di esaki.
Resientemente un dirigente preokupá a kompartí un potrèt di un parti di e pista, kaminda por mira kon esaki a sigui deteriorá den último lunanan.
Esaki ta básikamente hasi imposibel pa hasi uso di e pista den su totalidat. Anto si ta tòg us’é, e chèns pa e atletanan leshoná ta grandi.
Resientemente durante inisio di temporada di atletismo mester a usa únikamente kuater ‘baan’, mirando ku e otronan no ta den bon estado pa usa.
Gobièrnu ku plan pa dos pista
Fin di aña pasá e notisia a drenta ku gobièrnu di Kòrsou ta den e fase inisial pa por renobá pista na SDK, i tambe traha riba un fasilidat eksklusivamente pa atletismo na Stadion di Suffisant.
Siman pasá Federashon di atletismo (CAB) a papia ku OWCS, relashoná ku e proyekto akí.
CAB ta aploudí e inisiativa di gobièrnu, pero ta konsehá pa wak un pista di bon kalidat i duradero ku ta bai ku e klima ku tin aki Kòrsou.
