MERKA.- E legendario tenor spañó, Placido Domingo a renunsiá ayera di su funshon komo direktor general di Opera di Los Angeles esaki despues di un kantidat di akusashon di molèster seksual.
‘E resien akusashonnan ku a keda hasí kontra di mi den prensa a krea un atmósfera den kua mi kapasidat pa sirbi e kompania aki a keda komprometé’, asina el a skibi den un komunikado.
‘Ounke lo mi sigui traha pa limpia mi nòmber, ma disidí ku pa mihó interes di e empresa pa mi renunsiá komo su direktor general i mi retirá mesora di mi futuro presentashonnan ku mi tin programa. Mi ta hasié ku un kurason kibra i na mes momentu mi ta deseá pa e direktiva dje kompania i personal pa e Opera di Los Angeles sigui krese i sobresalí’.
Domingo, 78 aña, for di 2003 ta direktor general di e kompania ku el a yuda funda. E desishon a keda tuma un siman despues ku el a renunsiá tambe pa hasi presentashon na e Opera di New York.
Den luna di ougùstùs, 8 kantante, un bailarin a konta Associated Press insidentenan ku Domingo ku ta data for di dékada 80, inkluyendo un di un muhé ku a bisa ku Domingo lo mester a hinka su man bou di su saya i otro tres dama ku a sigurá ku el a sunchinan kontra di nan boluntat.

LAGA UN KOMENTARIO

Please enter your comment!
Please enter your name here