Dr Stella van Rijn ta splika
E aña aki dr. Stella van Rijn a tuma rienda ofisialmente di Universidat di Kòrsou, dr Moises da Costa Gomez. E tin plannan pa ku desaroyo di e universidat riba diferente tereno. Nos a haña algun di e plannan ku ta den tapara.
Stella ta un eksperto ku konosé e universidat den fondo ya pa 35 aña komo studiante i dosente. Un di su aktonan mas importante pa logra e desaroyo duradero ta ku e ta duna espasio pa skucha kada fakultat i dosente, pa komprondé nan nesesidat. Bou di esaki, el a traha un plan stratégiko ku ta kasi kla pa nos komunidat.
Maneho
Stella ta konta ku el a solisitá pa rèktòr ku un propósito klaro: krea un impakto sosial profundo riba e komunidat. El a traha hopi aña den gobièrnu, komo konsulado i periodista, pero loke ta motivá e realmente, ta e posibilidat pa kontribuí na desaroyo di Kòrsou. Stella ta enfatisá ku e kresementu no ta un meta riba su mes. E meta ta impakto nesesario riba nos isla. E kresementu di Universidat di Kòrsou no ta solamente riba e kresementu na tamaño, sino riba e impakto ku nos por tin riba nos isla. Komo un universidat nashonal, e tin un deber pa yuda desaroyá e pais i e hende. Esei ta e meta prinsipal: pa kontribuí na desaroyo duradero di nos isla i su komunidat. E trabou aki no ta solamente pa e studiante ku ta sali for di skol, pero tambe pa hende di edat mas grandi ku ke sigui desaroyá profeshonal.
Konosé bo merkado laboral
Kòrsou tin un merkado laboral kaminda hopi hende tin eksperensia, pero nan no ta bon eduká ofisialmente. Pa esaki, UoC por yuda via ‘Life Long Learning’, ‘Micro-credentials’, kaminda por strukturá e edukashon pa módulonan, elevando merkado laboral den kalidat. E realidat ta ku si bo no kontinuá formá bo mes, bo lo haña un stagnashon den bo merkado laboral. Tambe e ta suprayá ku nan ta hasi hopi investigashon pa konosé e nesesidat aktual di nos isla. Komo rèktòr di Universidat di Kòrsou, e tin e espasio pa atraé hopi grupo huntu, ku e ke desaroyá nos pais. Esei ta nifiká ku e por trese huntu partidonan, ONG’s, hende individual, organisashon, i gobièrnu pa elaborá riba e reto nan ku UoC ta enfrentá pa desaroyo di nos pais. Tin yen eskoho i dilema, pero e gran pregunta ta kon pa balansá e nesesidatnan ku ta suplementá pa nos isla.
Stella ta kere ku nos Universidat ta e fundeshi ideal, un lugá sigur kaminda por trese diferente grupo huntu pa logra un futuro duradero i balansá.
2029 te enfoke pa logra metanan pa ku Universidat
“Mi enfoke ta te aña 2029”, Stella ta bisa. Mester re-defini e ròl i evaluá e impakto ku e universidat a krea durante e 50 añanan aki. Manera a menshoná anterior, Stella konosé e universidat pa 35 aña, i durante e tempu aki, el a mira i eksperimentá e impakto profundo di nos universidat, no solamente riba su mes, sino riba e komunidat kompletu. Ta asina ku lo bai inventarisá ken tur e alumnonan ta, unda nan ta, i ki ròl profeshonal nan tin aki na Kòrsou i na nivel internashonal. Bo alumno ta un refleho di e impakto ku bo universidat a krea riba e komunidat, i esaki ta un tèstamènt di e kualidat di e edukashon. E ta evidensia di e kapasidat pa forma profeshonal pa nos isla. Stella ta sigur ku orígen di hopi hende ta dor di e universidat.
Estudionan nobo
Stella ta splika ku no solamente lo bai introdusí estudio nobo, sino ku e ke trata di enfoke nobo. A identifiká vários área di impakto ku por aliniá ku e tipo di estudio ku universidat ta ofresé. Un di nan ta inteligensia artifisial (AI). Resientemente, a presentá un estudio ku universidat a hasi, un tarea di UNESCO, ku ta enfoká si Kòrsou ta kla pa inteligensia artifisial. Inteligensia artifisial ta relativamente nobo pa mayoria hende, i esaki ta nifiká ku si bo ke siña algu di dje, hopi bia bo tin ku bai afó, òf dependé di informashon ku ta digital. Den un seshon ku universidat a organisá ku diferente partnernan, despues di e investigashon, a kontesta ku lo ta hopi bon si Universidat di Kòrsou lo por bira un “knowledge hub”, kaminda e konosementu riba AI i e desaroyonan pa AI por keda akumulá i distribuí den nos komunidat. Esei ta nifiká ku ke organisá i trese huntu tur esnan ku konosementu pa konektá nan na esnan ku tin mester di dje. “Tambe, ku Enseñansa awendia, nos ta komprondé ku e no ta sufisiente pa siña solamente e konosementu di un fishi. E realidat profeshonal ta eksigí mas amplifikashon”.
Enfoke riba enseñansa di fundeshi
Stella ta menshoná ku universidat ta bai enfoká hopi riba enseñansa di un fundeshi mas Amplio i despues spesialisá. huntu ku esaki, ta bai buta formashon i edukashon, pasobra awendia hasta si bo tin bo konosementu, pero falta e abilidatnan analítiko i komunikashon no ta sufisiente. Mester invertí i duna hopi informashon na un manera interesante.
Un otro aspekto ta ku ta bai traha huntu ku e sektornan mes. Den Enseñansa, ya esaki ta wòrdu hasi. Stella ta duna un ehèmpel di e programa ku yama ‘Kibra Hacha’. E opleiding di “funderend onderwijs” di Lofo, “Leraar Opleiding Funderend Onderwijs” ta traha hopi huntu ku skolnan. konhuntamente, ta guia e studiantenan pa e enseñansa di fundeshi pa futuro. Aparte ku e studiante ta sinti e trabou, organisashonnan tambe por mira e djamantanan ku ta wòrdu krea.
Konsentrá tambe riba atraé studiante den region
‘Absolutamente’, Stella ta bisa. E ta nesesario i deseabel pa motibu ku ke krea un interkambio kultural den e fakultatnan. Si bo tin studiante ku ta bini for di region, aki bo por siña na otro manera, i nan ta traha pa krea esei. E ta nesesario tambe pa e simpel echo demográfiko, ku ta mustra ku famianan no ta sigui krese i ta birando ménos. Esei ta nifiká ku al final, e skolnan tambe lo sinti e efekto di esaki. Stella ta kontinuá ku mester prepará pa kambia e base. Pa Enseñansa avansá, mester komprondé ku no ta un forma di enseñansa barata. Tin ku invertí hopi den e studiante. Ora nan produsí i tin un impakto riba bo komunidat, esaki ta nifiká ku mester tene un base sufisiente. Stella ta indiká ku el a manda señalnan pa Hulanda ku nan lo ta bon bini pa duna lès via di UoC. Kòrsou i Hulanda ta akreditá i afiliá na NVAO, esaki ta garantisá ku UoC por karga e kalidat nesesario. Asina, por tene un par di programa ku studiantenan internashonal.
Kooperashon mas amplio
Stella ta klousura ku su meta pa logra un kooperashon mas amplio pa universidat. E meta no ta solamente pa traha ku profesor i Universidat di Erasmus Rotterdam, sino tambe forma UoC komo un punto di reuní, un espasio kaminda e universidat ta inisiá i yuda hende riba aspektonan duradero. Tur e punto di diskushon lo keda dokumentá den un plan di proposishon i lo kompartí esaki ku e komunidat. Stella ta enfatisá ku komo universidat, nan tin un responsabilidat grandi pa krea e siguiente generashon ku ta kapasidat, konosementu i manera di pensa nesesario pa sigui desaroyá nos isla den un manera duradero i balansa.
