Plania bo embehesimentu; e grandi mester di atenshon na bida

Indra Rossen Lucasius; Direktor Fundashon Bírgen di Rosario

Dia 1e di òktober awor ta dia di grandinan. Indra Rossen Lucasius, direktor di Fundashon Bírgen di Rosario pa 10 aña kaba, ta konta di nos grandinan i e atenshon ku tin di duna na nan. Indra ta bisa ku hende grandi tabata su trabou pero awor el a bira su pashon. E ta hasi tur kos posibel pa purba duna e grandinan un bon bibá den e último fase di nan bida. Hende grandi p’e ta tur kos. E ta haña esaki un chèns pa e splika nan trabou. Nan ta un fundashon grandi ku mas òf ménos 400 hende grandi den kuido. Nan tin diferente kuido entre otro e hende grandi ku ta biba serka nan, pa motibu ku no tin kas òf ta biba ku un ruman kisas ku nan no ta bai bon kuné, i tin esnan ku tin mester di mas kuido i ta kai bou di lei Labizjan. Tambe tin e kasnan ku e hende grandi por biba independiente. Banda di esei, segun sra. Indra, nan tin pasadia pa e grandi ku ta biba na kas. Esaki ta unu ku nan ta stimulá hopi pasobra kisas e yunan ta traha i e hende grandi ta su so na kas i nan por bini i pasa dia na e fundashon. Ta un palèt di servisio Bírgen di Rosario ta duna pa e hende grandi ku meresé. Nan a kuida di nos i awor ta toka na nos pa kuida di nan. Na e parti di pasadia awor akí nan tin den kareda di 100 hende grandi aunke no tur ta bin tur dia pero e grupo ta grandi tòg. E parti intramural kaminda e hende grandi ta bin biba serka nan tin mas òf ménos 300 hende grandi. Fundashon Bírgen di Rosario tin total na Kòrsou 4 kas di hende grandi; tin Habaai esun di mas grandi i ku ta tuma 150 hende grandi, tin Nos Lanterno ku entre 70 hende grandi por biba, Richardus Te huis na Sta. Rosa kaminda 71 grandi por biba i nan tin un inisiativa partikular kaminda mas òf ménos 30 hende grandi por biba pero e famia mes tin di kubri e gastu di e  grandinan. I Mi Amparo ta kaminda e hende grandi ta bai pasa dia. Serka nan na Bírgen di Rosario tin hende muhé i hende hòmber aunke tin mas tantu hende muhé. No por bisa ku ta mas fásil pa atendé kuné, pasobra kada un tin nan manera.

Nos no ta kla pa enfrentá embehesimentu

Na Kòrsou e sifra di hende grandi ta basta haltu. Sifranan resien ta papia di un embehesimentu haltu di 25.9% di hende riba 65 aña. Pero tin sufisiente espasio pa e grandi ku mester di e yudansa di un instituto? Riba e pregunta akí sra. Indra a bisa ku 10 aña pasá ora el a kuminsá na e instituto, e tabata bisa ku e embehesimentu ta yegando pero awor e ta bisa ku e embehesimentu t’ei. Pero lamentablemente Indra mester bisa ku Kòrsou no ta kla pa enfrent’é. Tur kas di kuido ta yen. Na Kòrsou tin 8 kas di kuido finansiá i supsidiá pero ta yen chikí mas. I nan tin derechi di eksistensia. Loke ántes tabata normal ku sea famia, yu subrina ta sòru pa e grandinan, awe no ta asina mas. Hopi hende a muda bai Ulanda, tin hende grandi a bai serka famia na Ulanda, tabatin subrinanan ta atendé ku nan grandinan pero esei no ta e kaso mas. I mirando ku nos ta bai kana yega dia di hende grandi, ku ta otro siman dia 1e di òktober, di nan parti nan ke pone atenshon na esaki. Mester hasi algu. I no ta gobièrnu so mester hasi algu pero komunidat mester ta konsiente di loke ta pasando i mester duna granito pa e bira mihó.

Un mester yuda otro

Relashoná ku kiko por hasi, sra. Indra Rossen a toka esun ku ta duna kuido. Pa e dunadó di kuido hopi bes e karga ta kai riba un yu i tin bia e ta pasa su forsa miéntras tin mas ruman. Tur mester por yuda un tiki i mester wak kon ta atendé. Por ehèmpel hiba e grandi bai Pasadia pa aliviá e famia. E kasá tin bia ta yuda pero por mira e situashon penoso. Bario, bisiñanan tur por duna un man voral ora wak situashonnan ta sali for di man. Si wak por ehèmpel e embehesimentu, ta wak tambe e maltrato. E ta un parti skondí. Por ehèmpel un mama tin tres yu i un yu ta kue e sèn di e mama i no ta pone e mama den kas di kuido pasobra e ta pèrdè e sèn ku e mama ta haña di AOV. Esei no ta bon i e mama no ta papia pasobra e ta bisa ku ta e yu ei ta yud’é. Esei ta un forma di maltrato skondí. Bírgen di Rosario, sinembargo, tin un proyekto ku nan ta kere ku por yuda, kisas no tur problema pero e ta yuda aliviá e situashon.

Proyekto Case Manager

Sra. Indra Rossen a mustra riba e proyekto ku nan tin pa bai guia personanan/trahadó sosial pa yuda duna guia. Loke nan ta eksperensiá tin bia ta ku un hende den komunidat por tin un bon trabou i e mama a kuminsá lubidá. E yu ku no sa di e kuido, no sa tampoko kiko e por hasi i e personanan aki por yuda duna guia. Ta splika nan e malesa, i pa nan por rekonosé kiko por hasi i tambe unda por pone e mama manera na pasadia. Òf si e kos ta bira mas grandi nan por sa unda pa pone e mama. E tipo di proyekto aki si por prepará komunidat den forma di Case Manager, nan por yuda duna informashon. Tambe por wak kon por sostené e ‘mantelzorg’. E idea di e Case Manager ta yuda fasilitá pasobra tin bia e grandi no ta tende di e yu pero si di un otro hende. E proyekto di Case Manager nan ke logr’é huntu ku mas instansia den kuido manera ku Betèsda i Kuido integral Bándabou. Nan ta buskando finansiamentu pa asina por ehekut’é. Indra sa ku e problema ta grandi i no por solushoná tur kos pero por aliviá e situashon. Na Kòrsou no tin un punto di kontakto kaminda por bai buska informashon i p’esei lo por krea un ofisina pa e Case Managernan pa asina nan por duna informashon i bai wak e situashon na kas i duna un man. E proyekto ta kla i nan a manda e mensahe Ulanda ku ta finansiá e proyektonan aki pero no a logra ainda. Indra ta kere e ta nesesario i nan lo keda pusha i primi pa haña e proyekto finansiá. Na Boneiru tin e Case Managernan aki i por siña di otro ora wak e resultado ku ta logra i komo tal na Kòrsou e ta nesesario.

Diferente manera pa finansiá estadia di grandinan

Hopi bia por tende ku pa haña un lugá pa pone un hende grandi ta kostoso. Serka Bírgen di Rosario, sinembargo, tin dos manera ku por hasié. Sra. Indra a splika ku si e grandi tin un penshun so por hasi petishon na kas di Bario i splika e situashon i e petishon ta keda tratá na SOAW i ora akordá esaki, e hende por bai einan, basta tin lugá. Gobièrnu ta keda ku e AOV pero ta paga e gastunan. Si e hende grandi tin penshun tambe SOAW ta keda ku un parti. Tin e otro parti ku ta lei di Labizjan ku ta kai bou di SVB.

Finansa i persona ta keda un reto

Pa loke ta e parti finansiero i di personal di Fundashon Bírgen di Rosario, Indra a bisa ku esaki ta keda un desafio. Nan ta keda supsidiá for di minister di SOAW pero meskos ku tur otro instansia supsidiá, esaki nunka ta sufisiente. Aworakí tin un sondeo andando ku ministerio di SOAW a pone SOAB pa asina proba ku e sèn no ta yega. E tarifanan di Bírgen di Rosario for di 2012 no a keda indeksá, segun sra Indra Rossen. I meskos ta konta ku e tarifanan ku ta bin for di Lei Labizjan, tambe e tarifanan ta for di 2012 pero tin un sondeo for di RAC ku ta wak tur e instansianan finansiá pa AVBZ pa mira si e tarifanan ta konkordá i nan lo duna un indikashon kiko e tarifanan lo mester ta i asina lo bai negoshá pa subi tarifa. Indra a splika mas aleu ku nan sa ku e medionan ta limitá pero no por keda ku e entrada abou akí. Den nan kaso nan ta paga salario promé i despues sòru pa e grandinan kome. Esaki, sinembargo, ta trese kuné ku no por renobá fasilidatnan manera ta deseá pasobra e sèn no ta yega. Pa e parti di persona tambe nan ta den un lucha i ta difísil pa haña hende i ta difísil pa keda ku e hende ku bo haña. Tin diferente aspekto ta hunga un ròl entre otro e generashon di awor, nos yunan no ta keda traha 30 pa 40 aña mesun kaminda. Aunke serka nan tin hendenan ku hopi aña di servisio. Ta bin aserka ku e trahadó, despues ta bai traha na Boneiru kaminda e ta haña e dòler pagá pero no ta para ketu ku e kosto di bida tambe ta na dòler. Banda di esaki, nos profeshonalnan ta bai Ulanda tambe. Sifranan ta indiká ku tin mesun kantidat di yu di Kòrsou na Ulanda ku aki. Pero mester keda buska pasobra tin hende ta bin bèk. Loke ta hasi na Bírgen di Rosario ta ku e hende ku baha ku penshun si e ta fuerte i si e ke, ta laga nan traha algun luna i wak si ta tuma nan bèk. Pero tin kos ku por hasi, segun sra. Indra, por ehèmpel ku impuesto. Esaki pasobra tin bia e hende penshoná ta bin traha bèk, pero ta hañ’é ta paga asina tantu na impuesto ku e trabou no ta bira atraktivo mas. I p’esei e ta kere ku kisas por eksonerá e grupo ei. E sektor di kuido ku nan ta aden ta manera un ‘stoelen dans’ pasobra awe bo ta aki mañan bo ta aya dependé kiko bo haña komo pago. Nan a pidi atenshon na tur esaki i gobièrnu a keda di hasi un estudio pa wak e salarionan den e sektor aki. Trabou di kuido segun sra. Indra ni robòt ni AI no por tum’e.

Kantidat di hende ku demensia ta alarmante

Pa loke ta e hende ku demensia tambe por haña su lugá na e instituto aki. I e situashon di kantidat di hende ku demensia ta alarmante. Indra Rossen a bisa ku si mira despues di Covid kuantu hende tin demensia ta espantoso. I mester tene kuenta kon ta atendé ku nan den e instituto pa nan no kana bai. Den nan kaso nan tin un parti na e instituto kaminda e hende grandi no ta haña chèns di kana bai. Nan tin un tim di trahadó sosial ku a pidié pa wak si por traha un di dos departamento pa hende ku demensia pasobra mayoria hende ku nan ta hañando ta hende ku demensia. E situashon ta hopi tristu segun Indra. Esei ta algu ku mester haña su atenshon i p’esei e Case Managernan ta importante. I nan a mira ku mayoria di e hendenan ku ta bai Pasadia ta hende ku demensia. E ta trese kuné ku e hende grandi ta bira un peliger pa su mes pasobra e hende aki ta bon den skonde kos. El a menshoná un kaso di un señora ku su so ta biba den su kas, e yu ta biba riba e tereno den kurá. Dado momentu e señora a kima wea i a tir’é afó pa e yu no bis’é nada. Ta ora el a papia esaki na pasadia, nan por a informá yu di dje. Nos mester ta alerta ku nos grandinan, wak si e grandi ta baña mainta etc. etc. pasobra nan por skonde kos. I aki nos ta kai bèk riba e Case Managernan ku si nan konstatá algu, nan tin e fasilidat ku por laga hasi e tèstnan nesesario. Nan por duna guia i konseho kon pa atendé ku e grandinan.

Mas i mihó kontròl

Banda di fundashon Bírgen di Rosario, tin diferente kas mas ku a lanta ku ta duna alohamentu na grandinan. Hopi ta privá. Pero lamentablemente no tin sufisiente kontròl riba e trabou ku nan ta hasi segun Indra a bisa. E ta konsiderá ku tur hende mester gana nan pan i e ta wak e asin’aki; si e ke habri un snèk na su kas ta bin kontrolá pero si ke habri un kas di kuido ta djis pone un bòrchi den kurá, pone un página riba Facebook i kuminsá tuma grandinan. Hopi bes e kasnan di kuido ei no tin e personal adekuá. Den kaso di Bírgen di Rosario nan ta sòru pa tin personal kapasitá miéntras e otronan no tur bia sa di e malesa i e guia ku nan tin di duna. Ta diferente pida kos ku mester di atenshon. Sra Indra a komprondé ku segun un inventarisashon hasí, tin mas òf ménos 45 kas di kuido pa grandinan i e kontròl no ta tuma lugá. Ta ora kos sali for di man i famia sali papia ta bai kontrolá i ta sera e lugá. Esaki sinembargo no ta serka tur, pero tin ku e kosnan ta bai manera mester ta.

Nos ta bon den fiesta

Fundashon Bírgen di Rosario ta konosí pa organisá diferente aktividat pa grandinan. E direktor a konta djasabra ku nan ta bon den fiesta. Nan tòp aktividat ta e seú. Tur aña nan ta organis’é.  Febrüari ta nan luna di kolekta. Den prinsipio a kolektá algun mil pero den último aña a kolektá mas di 30 mil. I tur esei ei ta usa pa seú. E seú ta asina bunita, nan ta subi kaya i mas di 300 pa 400 grandi ta partisipá. E ta un esfera di kontentu, traha huntu i na ta hasié ku plaser i amor. E ta kòrda ku aña pasá el a bisa su koleganan ku por usa e mesun paña pero ta tur aña tin paña nobo. E parti di independensia ku nan mes ta organisá kosedó, banda, ta algu simplemente dushi i mas importante ta ku e grandi ta gosa. Nan ta organisá tur otro fiesta manera dia di mama, dia di tata. Nan ta hasi nan máksimo esfuerso pa e grandinan. I p’esei Indra ta yama e personal danki pa tur loke nan ta hasi pa e grandinan. Indra a traha 14 aña na hospital kaminda tin e pashènt pero serka nan ta un famia, e grandi ta bira nan famia.

Pone atenshon na bida

Famianan por lo general ta atendé ku nan ser kerí ora e keda poné den e instituto. Loke si Indra a topa ta ku kisas un mama ku tin 10 yu i tin no ta papia ku otro. Pa bienestar di e mayor ta bon pa atendé ku otro. Kisas krea un grupo riba ‘app’ i esun ku ta atendé ku e mayor ta pasa e informashonnan. Pero loke tambe nan a eksperensiá ta ku ora tin yu ta bibá na Ulanda, i nan bin Kòrsou no ta tene nan mes na regla. I aunke e mama ta un yu so e tin i aki na Kòrsou ta un tanchi ta regla kos aki pa e mama, ora e yu bin e ta pone e tanchi un banda. I nan a yega di topa situashon ekstremo kaminda e mayor tabata terminá, un yu na Ulanda ta bin Kòrsou i tin otro yu pa atendé aki. Ora e dia di bai Ulanda bèk tabata yega i e mama no a fayesé ainda, e yu ei tabatin e kurashi di bai serka dòkter pa pidi pa pone fin na mama su bida sino e tin di bolbe bin Kòrsou bèk pa entiero. Norma i balor ta kambiando pero mester bai trankil. E ta asta bisa pa pone atenshon na mama i tata ora e ta na bida.

Aktividat dia di grandinan

Relashoná ku dia di grandinan, kada kas tin su aktividat. Tin dos di nan grandinan ta bai partisipá na un aktividat ku Antonieta ta bai hasi na PWFC i e grandinan ta bai kanta. I Indra ta hasi uso di e oportunidat akí pa pidi nos hendenan pa pone atenshon na e grandinan, bai sinta un dia serka nan. Nan ta purba hasi aktividat pero no tur hende por bai pero kisas por bai sinta i lesa korant pa nan. Trabou boluntario ta bo biní. Por ehèmpel e grandinan ta gusta sali i por buska dos bai dal un kòfi òf algu. Un kos chikí ta hasi e grandi kontentu.

Mensahe

Mi ta yama tur ku ta yuda pasobra hopi ta hasié den silensio. Danki pa e sosten, danki pa e boluntarionan pa nan por hasi e kuido mihó posibel. Un apelashon na pueblo di Kòrsou ku si bo tin un grandi den bo bario bai bishit’é, kumind’é, hiba algu di grasia p’e. I si wak un situashon no bon purba pone atenshon na esaki. Tin bario tin Buurt regiseur i por inform’é ora algu no ta bai bon. Mi ke pidi tur ku ke yuda pa aserka nos sea ku donashon òf trabou boluntario òf un muebel. I laga nos reflekshoná pasobra nos tur ta bira grandi un dia i purba pa nos mes plania nos embehesimentu. Sinta wak kiko bo ke i kon bo ke i no laga ora bo bira grandi. Bida por kambia den un frakshon di sekònde. Sinta ku bo yunan  i plania kon bo ke bo kosnan entre otro bo tèstamènt i asina evitá diskushon.