Sheritsa Stroop presidente; Jacqueline Kwidama tesorero
DIDI Deeds Foundation ta muchu mas ku solamente beisbòl pa hóbennan. Den e kuadro aki djasabra a papia ku Sheritsa Stroop presidente i Jacqueline Kwidama tesorero di DIDI Deeds Foundation. Sheritsa ta mama di Johannes i Mariekson Gregorius “Didi”. E fundashon a keda lantá 14 di aprel 2021 temporada di Covid, pero a kuminsá aktivamente na 2023. Sheritsa ta konta ku e tata, i e dos yunan, tur ta karga e nòmber di kariño Didi. E DEEDS, segun e presidente a splika, ta pasobra na New York Didi tabata hasi Deeds esta, proyektonan karitativo i sosial pa e komunidat. I asina a yega na e fundashon DIDI Deeds. Hopi bia hende ta puntra ken ta nan spònser pero ta Didi ta esun ku a finansiá tur kos di e proyekto.
Museo i biblioteka
For di 2023 ku DIDI Deeds Foundation ta funshonando aktivamente nan a logra hopi, pero ke logra muchu mas. Sheritsz Stroop presidente i Jacqueline Kwidama a duna un bista di kiko mas nan ke logra. Dos kos sigur ku próksimamente ta den tapara ta e museo di deporte i e biblioteka. I e museo no ta beisbòl so pero hopi mas. Den Tera Kòrá tambe tin hopi ku a destaká den diferente deporte. Tambe ke yega na guia di e muchanan despues di skol. Kisas no ta hopi mucha lo por guia pero maske 25, esaki Sheritsa a bisa. E muchanan por kuminsá 3or òf mitar di 4 pero nan a ripará ku tin bia ta for di 2or e mucha ta bin einan. E mayor ta trese e mucha trempan pasobra ta un lugá ‘safe’ pa nan. Pero nan no ta un lugá pa ofisialmente risibí e muchanan. E muchanan ta bin ku nan ko’i kome, pasobra nan aktividat no a kuminsá e ora ei ainda i e mayornan ta konsiente di esei. I p’esei nan ta bai ofisialisá esaki, pa por tin hende ku por risibí e muchanan. Tin yùfrou di skol i sikólogo penshonado i lo ta bon pa haña un par pa yuda e muchanan. Pa Sheritsa no ta bai pa e tarea di skol so pero e mucha ta bin ku su kosnan i e por haña un guia.
No hasi nada pa otro pero pa bo mes
I pa mustra kon nan ta pone atenshon na e desaroyo di e hóben Sheritsa a menshoná ku nan a yega di invitá e mucha hòmber di Hóben ku Eskoho pa bin papia ku e hóbennan. No a bisa e muchanan nada pero a tuma nan di sorpresa, manda nan sala i ora e mayor bin buska e yu, a manda e tambe ta sala, pa asina di tur ángulo por duna informashon. Enpartikular esnan ku ta kresiendo pa tende di eksperensianan di esnan ku a logra i esnan ku tambe no a logra. Kiko mester konsentrá riba dje for di chiki. Nan sa hasié pa mucha hòmber pero ke hasié pa mucha muhé tambe. Sheritsa a bisa ku for di prinsipio ta e beisbòl tabata e sentro pa mucha hòmber pasobra e mucha muhé tabata mas den uña i modelahe. Pero den e modelahe tambe por guia e hóben den un bon direkshon ku ta importante pa su desaroyo. Nan ke duna charla tambe dirigí pa e mucha muhé. Sheritsa ta konsiente ku falta hopi mas di deporte den nos pueblo i por mir’é den e resultado di CBS resientemente, ku a bisa ku Kòrsou no ta hasi hopi den deporte. Pa Sheritsa, hende no mester hasi nada pa otro pero pa bo mes. Por ehèmpel, ora no tin aktividat pa e grupo di Kòfi Morgen, ta bai ku nan hasi zumba, pa asina nan ta den moveshon. Tambe awor akí DIDI Deeds a sòru pa lès di masashi pa nos hendenan grandi , ya nan mes por yuda nan mes.
Konosé Didi su historia
I komo mama di dos yu deportista, den e kaso aki Johnny i Mariekson Gregorius, Sherista a konta su sentimentu. El a bisa ku semper el a sintié ‘grounded’. Na Merka e ta un otro Sheritsa i na Kòrsou e ta un hende stret, masha simpel. El a keda e mesun Sheritsa i nada a subi na su kabes. E dos mundunan ei ta diferente. Na Kòrsou e ta meskos i na Merka el a ripará ku e mayornan di e deportistanan ta hendenan masha simpel. Sheritsa a tende hopi kos ku hende tabata pensa i bisa di Didi i p’esei e kier a aklará algun. Por ehèmpel hende a yega di bisa ku Didi no sa bati, pero e tin su historia. Na 2011 Didi a bira malu, e tempu ei ainda e no a subi Major League. Sheritsa e tempu ei tabata traha na St.Maarten. El a bisa ku Didi ta un yu ku no sa ta malu. Pero Didi a yam’é dado momentu bisando su mama ku e ta malu. Mesora Sheritsa a tuma kontakto ku esun na kabes i a pidi pa no pone su yu riba vèlt pero mihó pòst e mand’é p’é.E no por a kere ku e representante na Merka a tuma asina lihé na serio, i djis su tras e tim médiko ta yam’é pa papia di Didi su historia for di chikí. Sheritsa ta kòrda ku úniko kos ku Didi tabata sinti for di chikí ta ‘bloedneus’ i nada otro. Nan a hasi tur sorto di tèst di tur malesa i no a haña nada serka Didi. A pidi e mayornan pa nan bin Merka pa nan por hasi tèstnan mas profundo. A resultá ku Didi tabatin un defisiensia na su nirnan. I e proteina ku e tabata bebe tabata matando e. Asina a kuminsá ku tratamentu. P’esei, segun Sheritsa, tin bia e ta sinti komo mama ora e tende hende bisa ku Didi no sa bati, pero ta e proteina ta duna forsa i Didi no por kuné. Sheritsa ta konta kon di strès e ta ora tin wega, pa Didi no haña sla na su kurpa. Pero si bo mira Didi bo no ta kere pasobra e ta sonreí semper. Pero bo no sa kiko tin tras di kada sonrisa di hende.
Johnny tin hopi spit
I Johnny ta un otro kaso. E proyekto di DIDI Deeds ta su idea i e mes a hasi mayoria kos, tur trabou e ta sòru pa ta envolví den dje. E tin hopi spit i ta tuma desishon mesora, asina tantu Sheritsa komo Jacqueline a bisa. E ta hopi dediká na e muchanan. I hopi bia hende no sa kiko ta pasando tras di e kortina ei. Johnny tin hopi kreatividat. E mes tabata saka potrèt pa e muchanan keda ku rekuerdo. Kosnan sosial i dedikashon. E mucha ta keda biba den Johnny i Mariekson i esei por mira den algun wega ku nan a bin kuné i no solamente di beisbòl so.
Proyektonan pa futuro
Jacqueline a menshoná ku si wak den aki sinku aña, nan lo ke pa e edifisio bai un piso mas ariba. Nan ke apartamentu i sala pa hóbennan kaminda si nan tin ‘training’ por keda einan mes. E otro parti ku nan ke logra ta siña hende kushiná i tambe traha kosnan di kueru. Meskos ku Sta. Martha tabatin ántes, nan ke duna oportunidat pa hende skohe den kua área nan ke bai. Ántes Didi Deeds tabata duna hende kuminda pero awor ke siña e hende piska pa logra su mes kosnan. Tambe nan tin hopi mucha di Bándabou ku no tin transporte i tin un ‘coach’ ku sa yuda transportá e muchanan pa yega. Pero nan ke yega na un bùs pa asina por transportá e muchanan ku no por yega. Por transportá e mucha tambe ora di kompetensia pa por busk’é si e mayor no por. Esaki ta otro proyekto ku nan lo ke logra. No mester ta un bùs nobo pero si un ‘safe’ pasobra e shofùr nan tin kaba. Awor akí nan ta hür bùs i sa haña di Banco di Caribe pero nan ke tin nan mes bùs. Por us’é pa e hóbennan i pa e hende grandi pa asina por hasi muchu mas. Jacqueline su deseo ta pa por haña mas hóben adulto pa duna un man pa hasi otro kosnan. Por ke tur kos, pero un dia nan tambe tin di baha. E sa ku no por hala kita sin mas pero mester tin hóbennan pa tuma over. Pa un bon lider mester tin kontinuashon i nan ke laga relevo.
E sentro di bario mester para pa e abitantenan
Sheritsa ta kere den hóbennan i p’esei nan ta traha riba kontinuidat. Por ehèmpel awor akí tin mas kas ta bin den Tera Kòrá miéntras e Sentro di Bario mester pasa pa e abitantenan. Mester kuminsá strukturá kosnan. E bario ta grandi i ku e kasnan ku gobièrnu ta bai traha lo bin mas famia i mester tin algu pa e muchanan. I mester kuminsá traha riba dje no ora e proyekto di kas ta kla pero mester kuminsá traha riba dje for di awor. No por lag’é na Didi Deeds so i si tin algu ku ta sosodé ta bon pa informá. Ta huntu mester hasié pa e hende i pa e bario. Didi Deeds no ta haña supsidio di gobièrnu, nan ta hasi hopi kos i ta hasi hopi pa generá sèn riba nan mes. P’esei nan ke e museo di spòrt museo i e biblioteka bin kla. Ta nan mester karga henter e proyekto pa e no dependé.
