WILLEMSTAD – Un operashon polisial na Willibrordus awe mainta trempan a resultá den deskubrimentu di un plantashon grandi di mariwana i a hasi vários detenshon. Segun promé informashon ku EXTRA a risibí, Departamento Anti Krímen Organisá huntu ku Team di Aresto a drenta riba un tereno den e área di Willibrordus i durante e operashon a topa ku no ménos ku sinku vèlt grandi yen di mata di mariwana. E plantashon tabata bastante ekstenso i polis a konfiská tur e matanan di mariwana durante e akshon.
Tambe algun persona ku tabata biba riba e tereno a ser detené relashoná ku e kaso.
Na e momentu aki no tin informashon ofisial ainda tokante kantidat eksakto di mata di mariwana ku a ser hañá, balor kalkulá di e droga ni kuantu persona eksaktamente a ser detené.
Investigashon ta kontinuando pa determiná ken ta responsabel pa e plantashon i kua ta e ròl di e personanan detené. EXTRA ta sigui pendiente pa mas informashon tokante e operashon i e detenshonnan.
){kind=link}