Plantashon ta un terapia, sanashon; Ban Hòfi ku Tony

Dia 4 di yüni awor, EXTRA Digital ta lansa un produkshon nobo “Ban Hòfi ku Tony” presentá pa Tony Castro. Un programa kaminda nos lo bai siña entre otro tur e trikinan di plantamentu, kiko hasi i kiko no hasi. Tony Castro komo anfitrion di e programa aki lo hiba nos te den kuna di plantashonnan na Kòrsou. Algu ku hende no por imaginá nan mes ta sosodé aki na Kòrsou.

Dia Maduro, presidente di Venezuela a sera frontera promé biaha, Tony a mira e reakshon di públiko pa e nesesidat ku a surgi. E tempu ei a frontera no a keda hopi sera. Pero despues tambe a bin orkan Irma kaminda tambe a surgi un nesesidat di fruta i berdura. I awor atrobe frontera ta será i e nesesidat ta grandi. E ta trese na e situashon pa e urgensia ku ta eksistí pa Kòrsou bai planta. Remarkabel ta segun Tony ku tin hende na Kòrsou ku semper di nan bida nan a planta i komo Tony mes a kuminsá chikí chikí dos aña pasá ku plantashon, el a siña konosé hendenan ku tin hòfinan ku hopi lo no kere ku ta aki. I ta netamente na e hendenan aki e programa di Ban Hòfi ku Tony lo dediká tempu na dje.

 

Kuantu tempu nan ta planta, kon nan ta hasié…Mi mes ta siñando masha hopi mes….tin hendenan ku algun kos masha masha bunita, Tony a enfatisá.

 

Hopi ta konsiderá plantashon komo un arte. Pero pa Tony Castro e ta un terapia, e ta un sistema di sanashon e ta yoga, e ta trese trankilidat. Si mira bon agrikultornan no ta rabia, ta hendenan trankil. I si Google por mira esaki. I si mira riba Youtube por mira kon hende ta planta, sin sa ku aki na Kòrsou mes tambe e ta keda hasí kaba.

 

E biahe di plantashon…..

 

Den su biahe di plantashon Tony a dal den Permaculture, den Honk i hopi mas. Esun impreshonante pa Tony ta Permaculture pero e ta un sistema hopi difísil. Pero manera Tony a bisa, un dia e lo yega na e sistema di Permaculture tambe. Awor konosiendo plantashon mas di aserka, Tony a kuminsá ku bora un pos pasobra e matanan mester di awa.

 

No ta fásil….

 

Plantashon den e klima kayente di Kòrsou no ta fásil. Su amigunan portugues i ulandes ta bisa ku tur kos ta den e preparashon i e plantashon ta e último. Mester koba buraku, kompost esta, prepar’é i planta. Pero tin bia bo ta hasié asina i nada ta pasa. Un ulandes a siña Tony di e wèpsait Rhythm of Nature. E wèpsait ei ta siña presis ki dia mester planta. Pa luna di mei e wèpsait ta siña bu ku bo por planta di 7 di mei te ku 19 di mei. Ora wak luna, e ta e luna ku ta kresiendo di chikí bai grandi. I ora Tony a bai hòfinan el a ripará ku nan ta plantando den e dianan ei. I nan no ta wak e wèpsait pero nan sa di e temporada presis pasobra ta wak luna.

 

Rancho I Love You…

 

Pa loke ta su hòfi mes, Rancho I Love You, el a bisa Djasabra ku ya el a kosechá diferente fruta i bèrdura, el a kushiná i kome esakinan. Bèrdura tin su temporada. I mayoria di nan ora e saka e fruta i bèrdura e mata ta muri bai. “Tabatin un tempu mi a sinti mi hopi orguyoso pasobra mi a traha un hòfi kaminda tur bèrdura den dje ta di mi hòfi”. I su hòfi tin hopi di amor den dje pasobra ta amor so ta vibra den e hòfi aki. Tony a bisa ku e por lanta un dia down pero ora e drenta e rancho e ta haña bida bèk. For di mitar di 6 e ta den su hòfi. E hòfi ta kambia su karakter.

 

Importansia di plantamentu….

 

Ban Hòfi ku Tony ta pa konsientisá hende kon importante plantamentu ta i no tin niun hende mas mihó ku e protagonistanan mes. El a menshoná e hòfi di Tico. Tico tin 28 aña i ya e tin mas di 10 aña ku su hòfi. Tico tabata gusta yag prikichi i yuana i asina el a kana dal den e posnan di Shell. I asina el a kuminsá planta i por mira ku e tin pinda, papaya, yambo, menta. I no ta nada fásil pero ta esei e ta hasi. Tico a kuminsá ku 16 i 17 aña i el a invertí su sèn ku e tabata gana den su hòfi. Tico no ta bebe ni huma ni kome karni.

 

Tambe el a entrevista e famoso Aziz. E ta asina leu ku e ke ‘clone’ un patia i pampuna. Tambe tin sra. Sultana Felipa ku un kurá tur na varens. I asina a pasa hopi hòfi pero tin hende no ta gusta kámara i apesar ku e hòfinan ta hopi bunita no por a filma esakinan. Tin hende tampoko ke pa filma pasobra áwaseru no ta kayendo. I tin hopi kaminda mas ku Tony lo bai manera Child First Foundation ku den Buena Vista a kuminsá siña hóbennan planta. Ban hasi e muchanan rustig. Deporte ta bon pero por mira un kambio den un mucha su karakter ku plantashon.

 

E mèst “black gold”…

 

Loke Tony a siña den e biahe di plantashon aki ta ku mèst ta masha importante. I e mihó mèst ta e Black Gold, e mèst di galiña. E mèst ei por hañ’é asta pòrnada. E ta hole poko stinki pero no tin mihó mèst kuné. Den e entrevista ku Tico e ta duna splikashon amplio di dje. E ta hasi koko dushi. Tin otro agrikultor ku ta kombiná su mèst ku awa di laman. I asina den e programanan lo siña diferente triki i téknikanan. Mester dediká tempu na bo matanan i no kere e kuentanan di ku mester kanta pa e mata…..dedikashon na un mata ta ku mester muhé mainta i atardi, mèst konstante, paga tinu riba e bestianan ku ta bin den  serkania. I mester tene yuana, konènchi i djaka for di e matanan. Pero na Yonka Tuincenter tin algu spesial kontra di yuana i tambe por planta promèntè banda di e matanan i esei tambe ta yuda tene e yuananan leu. Meskos mester tene kuenta ku galiña, pero esei ta naturalesa.

 

Kuminsá chikí…

 

Esun ku ke kuminsá planta awor aki ta mihó kuminsá chikí. No hinka hopi sèn na granèl pero purba chikí chikí. E kos mester tin un ‘leukheid’ den dje. Kuminsá den baki i èmber i kue e téknika i despues bai den mas grandi. I for di plantashon un hende ta biba di dje. I den e programa di ban Hòfi ku Tony por mira prueba di esaki. Hendenan lo duna tepnan balioso, un di nan ta harpamentu. Nos ke hòfi nèchi pero mester laga naturalesa hasi su trabou.

 

Sostené nos hendenan ku ta bende riba kaya…..

 

Ban Hòfi ku Tony lo ta riba tur djamars mèrdia 2 or kuminsando djamars 4 di yüni riba e plataforma digital di EXTRA. Ta un biahe ku e lo hasi rònt Kòrsou pasobra aki tin hòfinan masha masha bunita. Tony a pidi pa ora mira hendenan ta bende fruta i bèrdura, para i kumpra serka nan, pasobra ta asina so ta sostené nos agrikultornan lokal.

SHARE

LEAVE A REPLY