Plataforma di Músika Skempi ta bai internashonal!

...Di man robes pa man drechi: Tanja Waas representante di Guardian Group, Minister di Desaroyonan Ekonómiko, Steven Martina, ko-fundadó di Skempi Boudino de Jong i representante di UTS, Darianella Brooks i Juan Bernal...

WILLEMSTAD.- Awe ta marka e lansamentu ofishal di e plataforma nobo di Skempi. Skempi ta un plataforma di músika pa skucha músika “online” ku a wòrdu lansá 5 aña pasá. Den komienso, Skempi su enfoke tabata pa publiká músika di artista independiente di e orígen karibense.
E organisashon lo sigui hasi esaki, pero awor lo ekspandé e plataforma pa ofresé músika di artistanan independiente internashonal. “For di inisio tabata semper nos mishon pa revolushoná e manera kon ta distribuí músika “online”, pero pa por a hasi un impakto real, bo mester tin e mihó teknologia na bo disposishon.”, ko fundadó i direktor di Skempi Boudino de Jong a bisa. Bo no por kibra e industria di distribushon di músika si bo servisio no por ofresé e mesun nivel tékniko manera e plataformanan ku aworakí ta dominá e merkado, manera Spotify, SoundCloud i Apple Music.
For di 2016, e kompania di inovashon digital yamá Profound Projects a uni forsa ku un kompania di inovashon digital ku ta establesé na Silicon-valley pa asina huntu nan produsí un plataforma di Skempi nobo usando e último teknologianan disponibel.
Awe ta marka e dia ofishal ku e plataforma nobo di Skempi a bai live: www.skempi.com Ounke esaki ta un lansamentu grandi pa Skempi for di un prinsipio teknológiko, e trabou mas grandi lo kuminsá awor, esta pa ekspandé i bira un plataforma internashonal. Komo parti di e vishon pa revolushoná e industria di músika independiente, Skempi ta trahando riba e introdushon di e promé moneda di “royalty” pa músika, e Skempi Coin, kual ta planiá pa wòrdu lansá na fin di aña 2018.
E Skempi Coin lo wòrdu ofresé pa un ICO (Initial Coin Offering) i lo wòrdu integrá ku e famoso protokòl di Blockchain, Ethereum. Esaki lo hasi e Skempi Coin un moneda di e estilo ERC20.
Skempi ta trahando un proseso di mina digital ku lo wòrdu konektá ku e plataforma di músika, kual na un manera fásil bisá, e balor di un Skempi Coin lo wòrdu determiná pa medio di dos parameter: entrada finansiero ku wòrdu generá i e montante di skuchadó riba un kantika.
Aktualmente Skempi ta trahando huntu ku Ministerio di Desaroyonan Ekonómiko pa asina organisá e inisiativa aki mirando ku esaki lo ta un di e promé inisiativanan di ICO pa e isla aki. Komo parti di e ICO, un di e promé inovashonnan ku lo wòrdu introdusí riba e plataforma nobo di Skempi, ta e portal di artista.
Un funshonalidat ku lo duna artistanan e posibilidat pa krea i manehá nan propio página riba Skempi. Esaki lo duna nan e kòntròl kompletu di kua kantika nan ta publiká riba e plataforma. Skempi ta ofresé un wèpsait i aplikashon pa Android i IOS ku lo ofresé un plataforma di último teknologia, ku mas di shen mil kantika, i un suskripshon di “Premium” ku ta duna bo e oportunidat pa tende kantika asta ora bo no ta konektá na internèt ademas bo por skucha kantika sin e interupshon di propaganda.
Mas informashon tokante e ICO di Skempi, inkluyendo e dokumento ofishal di e “whitepaper”, lo wòrdu publiká den sèptèmber di 2018.

SHARE

LEAVE A REPLY