CIUDAD DE MEXICO, MEXICO (AFP).- AeroMexico a suspendé su buelonan pa Quito meimei di un krísis diplomátiko. E suspenshon ta pa un periodo di seis luna debí na un kantidat abou di pasahero i meimei dje krísis diplomátiko entre Mexico i Ecuador.
E operashonnan ku ta uni e kapital ekuatoriano ku Ciudad de Mexico lo keda suspendé di 1 di yüli pa 18 di desèmber próksimo “debí na e redukshon di interes riba e ruta”, segun e kompania a splika na su klientenan.
E dos paisnan a kibra relashon ku otro despues dje anochi di 5 di aprel ku un komando polisial élite ekuatoriano a drenta embahada di Mexico na Quito pa detené e refugiado eks vise-presidente ekuatoriano Jorge Glas, akusá di korupshon pero kende a pidi asilo, alegando persekushon polítiko.
Mexico ta tene su embahada será, loke ta trese kuné ku ekuatorianonan mester biaha pa Perú òf Colombia pa atendé ku visa na e ofisinanan konsular mehikano. Embahada ekuatoriano den e kapital mehikano tambe ta inaktivo i kualke dokumento ku mester keda atendé ta bai resultá sea na Guatemala òf Merka.
E dos gobièrnunan ta den un bataya den Korte Penal Internashonal, kaminda Mexico a akusá Ecuador di a violá e Konvenshon di Viena di 1961, ku ta garantisá ku outoridatnan di un pais no por drenta sedenan diplomátiko di otro pais sin risibí outorisashon.
