‘Situashon di hopi famia ta bou di preshon’
WILLEMSTD,- Frakshon di MAN-PIN den Parlamento a tuma nota di e resultadonan di e Enkuesta Sosial 2025, prepará pa Ofisina Sentral di Statistik (CBS), den kua ta indiká ku situashon sosial-ekonómiko di hopi kas di famia ta bou di preshon. Segun e enkuesta, na aña 2025, 53,6 porshento di kasnan di famia no por kumpli ku pago di nan debenan i na su opinion un instansia ofisial pa duna guia i asistensia ta mas urgente ku nunka.
Kolaboradó pa frakshon di MAN-PIN den Parlamento, Yaël Plet ta mustra ku no ta un sekreto ku pobresa ta oumentando den pais i ku hopi famia tin difikultat pa kubri nan nesesidatnan básiko. “Esaki ta reflehá dèk den e preshon finansiero grandi ku hopi famia ta eksperensiando. Den e último añanan, e problemátika di debe a bira un tema importante den diferente diskushonnan, konsiderando ku un kantidat grandi di hende mester fia sèn pa por kubri gastu básiko di bida”, Plet ta duna di konosé.
E ta indiká ku e yamada pa un instansia ofisial ku por ofresé guia i asistensia na personanan ku ta enfrentá problemanan di debe ta mas urgente ku nunka. “Ademas, e situashon aki tin konsekuensianan ku ta bai mas aleu ku solamente e aspekto finansiero. E ta afektá e bienestar sosial i mental di hende, i tambe nan salú físiko.”
Plet ta bisa mas aleu ku konforme e publikashon di CBS, un grupo grandi den nos komunidat no ta hasi sufisiente aktividat físiko pa mantené un estilo di bida salú. Na mes momentu, hopi hende ta bishitá dòkter pa motibunan médiko òf ta mèldu na trabou ku nan ta malu, loke ta situashonnan ku por tin relashon ku strès i preshon finansiero. Riba e tema aki frakshon di MAN-PIN a hasi un total di 7 pregunta i ta pidi gobiernu, den kaso aki Minister di Desaroyo Sosial, Labor i Bienestar (SOAW) pa tuma akshon.
E frakshon a puntra na si e minister a tuma nota di e rapòrt Enkuesta Sosial 2025 di CBS i si minister ta konsiente di e situashon finansiero difísil ku hopi kas di famia ta den dje. Tambe ta puntra si minister ta na altura di e echo ku e problemátika di debe ta pone hopi hende biba bou di strès, ku por tin konsekuensianan pa nan salú mental i físiko, i kiko ta e vishon di gobièrnu i kua medidanan konkreto ta prepará pa atendé e problemátika aki, tantu riba término kòrtiku komo largu. E frakshon ke sa alabes si gobièrnu ta dispuesto pa deklará e problemátika di debe di kasnan di famia komo un di e prioridatnan prinsipal den su maneho di polítika sosial.
Finalmente frakshon di MAN-PIN ke sa den kua periodo gobièrnu ta presentá i implementá medidanan konkreto pa atendé e problemátika aki, konsiderando ku e situashon ta kontribuí na problemanan sosial, ekonómiko i di salú públiko, i kon a para ku e maneho di pobresa ku a primintí.
