Willemstad.- Outoridat polisial a start un investigashon relashoná ku un kaso di ladronisia di outo despues ku a topa un vehíkulo plumá den Kaya Draam den Soaux.
Ladronisia di outo, kaminda ku malechornan ta kita tur e parti i piesanan ku nan tin mester, ta un plaga ku ta terorisá nos pais den e último 10 aña i ku Kuerpo polisial ta hasiendo nan máksimo pa kombatí. Den pasado Polis a yega di pone man riba sospechosonan ku ta opera den loke a keda asta konsiderá komo un forma di krímen organisá. Den un konferensia di outoridatnan internashonal (interpol) ku a tuma lugá algun tempu atras aki na Kòrsou, a menshoná ku ladronisia di outo ta un problemátika mundial i ku ta traha hopi serka ku entre otro garashinan/mekánikonan pa notifiká na momento ku klientenan presentá ku piesanan sin resibu di kompra.
