‘Mi ta mira señalnan di diktadura’
WILLEMSTAD.- Partido Nashonal di Pueblo (PNP) lo bai ta e sorpresa e elekshon akí. Despues di elekshon e partido ta bai pa formashon di un gobièrnu ku signatura di PNP. Asina lider polítiko di PNP, Ruthmilda Larmonie-Cecilia, a duna di konosé ku hopi konvikshon durante e podcast ‘3’or ku Gino’ riba plataforma digital di EXTRA.
E loke lider polítiko ta indiká ku PNP ta bai ta é sorpresa den elekshon a base di loke ta tende serka e pueblo votadó. PNP no a sigui e enkuestanan polítiko mashá pasobra na opinion di e partido mayoria enkuesta tin sierto intenshon premeditá nan tras. Mas importante pa Larmonie-Cecilia ta importansia di e elekshon akí.
“E elekshon akí ta hopi importante pasobra e ta bai determiná kurso i rumbo di pais. Nos ta mira kiko ta pasando. Ora PNP tabata den gobernashon por a mira un balansa. Ora a saka PNP for di gobernashon por mira un kos pa loko. Hendenan ta bisa mi tambe Mimi keda trankil pasobra bo tin ku bai bèk den gobernashon pa sigui ku e trabou.”
E lider polítiko di PNP ta sigui splika ku pueblo di Kòrsou por mira tur e logronan di PNP durante e 3 aña i 4 luna ku e partido tabata den gobernashon. “Tur loke ta kosechá aworakí ta abase di trabounan ku PNP a hasi. Ta pa e motibu akí mester a saka PNP for di gobièrnu pasobra a bisa ku PNP tabata bai muchu duru.”
Larmonie-Cecilia ta indiká ku den parlamento tambe PNP tabata hasi su trabou pa tene gobièrnu skèrpi. “PNP ta un partido di òrdu, desensia i disiplina. Mi ta huntu ku bo den koalishon no ta nifiká ku mi ta laga bo hasi loke bo ke.”
Ku esaki e lider polítiko ta mustra ku apesar ku por bisa ku PNP tambe a sostené MFK durante gobernashon den asuntunan ménos bon, realidat ta ku PNP no a permití kosnan pasa pa loko i tabata un balansa den gobièrnu. “Ta p’esei PNP ta bai pa signatura di e siguiente periodo di gobernashon. Mas aleu Larmonie-Cecilia ta atvertí ku demokrasia di pais ta na peliger.
Komo ehèmpel e ta referí na e karta di 9 parlamentario di MFK. “Asina ke tapa boka di pueblo. Un parlamentario no mester di konfiansa di otro parlamentario. Nan tin e konfiansa di pueblo. Asina ke mina demokrasia.”
E lider di PNP ta bisa ku asta e ta mira señalnan di diktadura na Kòrsou. “Ora un hende sali reklamá algu ku gobièrnu a hasi e ta haña menasa, ta kaba kuné i e ta haña “aanslag” di impuesto den su brivenbùs.
Por sigui e podcast kompletu ku Larmonie-Cecilia riba plataformanan digital di EXTRA manera wèpsait, página di Facebook i Youtube.
Foto:
…Ruthmilda Larmonie-Cecilia…
