MEXICO (AFP).- E poderoso trafikante di droga Nemesio “El Mencho” Oseguera finalmente a keda matá pa ehérsito mehikano. “El Mencho” tabata un trafikante sumamente poderoso i peligroso kende pa konsolidá su poder a sòru pa krímennan horendo.
Ku e apodo “El Mencho”, e trafikante di droga di 59 aña tabata e figurá di droga mas buská pa gobièrnu di Merka, ku a pone un rekompensa di 15 mion dollar pa su kaptura. E tabata wòrdu konsiderá komo e último trafikante (‘capo’) na e estilo di Joaquin “El Chapo” Guzman i Ismael ”El Mayo” Zambada, kendenan ta den prizòn na Merka. “El Mencho” a nase na Aguililla, un pueblo dje estado di Michoacán, kaminda ku plantashon ilegal di mariwana a floresé tempu ku e tabata mucha. Komo hóben el a emigrá pa Merka, kaminda el a kai sera pa tráfiko di heroina pa despues e keda deportá. Na su tera natal el a uni su mes na e ‘cartel’ Milenio. Pero poko tempu despues, guera interno den e organisashon a resultá den su ekspulshon. Un parti dje grupo di Milenio a uni su mes na Zetas,un grupo fundá pa eks-militarnan élite ku tabata imponé teror den e estado ei i den otro partinan dje pais.
Osegura a refugiá pa e estado bisiña Jalisco, kaminda banda dje grupo Sinaloa el a krea den 2009 e grupo “Matazetas”, ku dos aña despues a mustra su poder brutal lagando 35 kadaver serka di un reunion di fiskalnan dje pais den Veracruz.
Despues el a los dje grupo i a funda Cártel Jalisco Nueva Generación
(CJNG), ku kua rápidamente ela gana forsa. Despues di ekstradishon di Chapo Guzman i Mayo Zambada, su ‘cartel’ a bira esun mas poderoso di México. El a krea un grupo grandi di sikarionan, tambe a yega na fabriká su mes armanan i a ekspandé den vários estado dje pais.
E ta un ‘cartel’ “transnashonal ku presensia den kasi tur estado di México”, ku ta trafiká ku fentanilo, ta ekstorshoná, mata migrantenan, hòrta petrolio i mineralnan i ta hasi negoshi ku arma.
Osegura durante di hopi aña tabata for di publisidat kuidando su mes pa no bira un figura públiko. Pero den 2024 el a aparesé den pantaya di dos konsierto di “narcocorridos”.
El a kasa den dékada di 1990 ku Rosalinda Gonzalez Valencia, ku kende e tin tres yu promé ku el a divorsiá. Su eks kasá i dos di su yunan a yega di keda detené. E señora a sali liber, pero “El Menchito”, manera nan konosé su yu mas mayor, aña pasá na Merka a keda kondená na bida largu di prizòn.
A kima vehíkulonan na vários parti di Jalisco i blòkia kaminda komo intento pa stroba e operashon polisial i militar den e siudat.
