Nos a sera konosí resientemente ku Jennifer Balentin bailando riba Pole. Pole Dance ta bai bèk na mas ku 800 aña atras i no ta un baile usual na Kòrsou. Sinembargo Jennifer Balentin a laga nos sera konosí ku Pole Dance.
El a konta ku bo mester di hopi forsa pa por hasi e Pole Dance pero no ta algu ku ora bo kuminsá bo mester di forsa pe. Bo por “build up” i haña forsa. E ta kita strès i ta algu masha dushi pa hasi, tabata su promé palabranan. El a kuminsá na 2018 ora e tabata biba na Dinamarka i einan a bai lès. El a gusta ku ora el a bin Kòrsou el a bin ku su bara Pole. Pero despues el a kumpra un mas i asina e tin dos Pole pa e por trein i perfekshoná su mes.
Pole Dance na Kòrsou
Jennifer a studia International Business Management na Ulanda, despues el a hasi su master den Marketing and Innovation na Dinamarka kaminda el a siña e Pole Dance. E ta kòrda ku studiante di master tabatin un studio, kaminda e ta bai skol kaminda el a bai siña e Pole Dance. Jennifer tabata hasi balèt na chikí pero e no ta kere ku esei a influensiá pa hasi e Pole. E ta dos kos lòs for di otro ounke tin sierto faktor di balèt ku ta bin hopi dilanti. Por ehèmpel ora ta baila riba e pia tin di pone e tenchinan un manera manera bailando balèt. Tin kosnan chikí ku ta bin bèk di e balèt. Jennifer no a hasi e balèt asina tantu aña ku e por bisa ku esei a influensiá pa e bai siña e Pole Dance.
Siñ’e na Dinamarka
E ta konta nos ku na Dinamarka nan tabata hasi hopi kos. Einan e sistema ta otro i tin hopi libertat pa hasi kosnan aparte di studia. Un di e hendenan ku ta bai skol kuné, den e mesun estudio el a introdusié. El a bai un lès pa prueba promé i el a namorá mesora di e Pole Dance. Kaminda el a bai siñ’e e hendenan ta asina amikal i habri. I tur hende for di chikí te hende grandi pro bai e lès. Tur esei a poné kariñá ku e Pole Dance.
Diferente kategoria di Pole Dance
Pole Dance no tabata den un bista masha positivo. Por wak “strippers” ta bailé i den kabarèt. Jennifer mes ta kere ku originalmente Pole Dance a kuminsá asina. Den e mundu di pole tin masha hopi sistema, tin “stripper” pero tin otronan tambe. E ta kòrda un bia el a bai un kompetensia pa wak el a ripará ku tin diferente kategoria. Tin mucha di 6 i 7 aña ta hasi e Pole i tin “strippers”. Tin asina tantu kategoria, tin sport dance, moderno, eksótiko i ta e hende mes tin di buska esun ku ta kuadra kune. Jennifer a bisa ku e “strippers” tambe ta baile bon pero ta un otro tipo di Pole. Den su kaso el a konsentrá riba e spòrt, ounke esei ta rekerí mas forsa i ta hasi algun triki i e ta kombin’é ku e baile. Tin hopi triki ku e ta hasi ku ta kai bou di e kategoria ei. Tin hende ta hasi Pole i e bara ta spen i e moveshonnan ta bira aun mas atraktivo.
Bara ta spin
E bara Pole ta spen. Jennifer a bisa ku e por spen òf e por keda para un kaminda. Ora e ta drei i bo ta beseg, abo baliadó mes ta pone spen. E por bai hopi lihé i p’esei mester paga bon tinu pa e no drei muchu lihé. I no tin di hunta nada na kurpa pa por wanta na e bara. Ta wanta na e bara ku solamente kueru. Mester sera múskulonan huntu i asina wanta riba e bara. Den prinsipio e tabata hasi hopi doló. Jennifer a bisa ku awor aki e no tin plekinan blou na su kurpa pero ora ta siña, bo ta primi bo bèlnan huntu i e ta hasi hopi doló. Tin un puiru ku atletanan ta usa pa wanta riba bara pero Jennifer no ta gust’e pasobra bo ta keda wanta un kaminda, siendo ku sierto momentu bo mester por glei.
Les di Pole Dance
Jennifer a sigui bisa ku tin algun hende na Kòrsou ku ta hasi e Pole Dance. E mes ta duna lès na un grupo chikí pasobra e ta kombin’é ku trabou den wikènt. I tin hende ta bin tuma lès serka dje. Tin mas studio ta duna Pole Dance.
No mester tin miedu
Kiko mester tene kuenta kuné? Jennifer a bisa ku no tin di tene kuenta ku nada ora ku ke siña e Pole Dance. Ounke el a enfatisá ku e hende ku ke siñ’e no mester tin miedu. Tambe e hende ku ke siñ’e mester tin gana di pusha su mes un tiki. Tambe bo mester tin forsa den brasa. Mester kustumbrá i asina e parti di siña ta bai mas fásil.
Grep na e bara
Den su kaso, a tuma tòg un tiki tempu pa e kustumbrá ku e grep na e bara. Na kuminsamentu e tabata hasi doló. Pero despues ora bo kueru kustumbrá e ta bai mas fásil. I esei mes tabata e barera ku el a surpasá pa por sigui baile. I hopi hende ku mir’e ta baila e Pole Dance ta keda sorprendé ku e tin asina tantu forsa.
Un studio mas grandi
E ta spera ku e por sigui krese pasobra pe mes e ta siñando ainda. Tin moveshonnan ku e tin gana di hasi. Su meta ta pa e por tin un studio mas grandi na Kòrsou pa asina e tin mas lugá pa tur hende ku ke siña Pole Dance. Awor aki e no tin muchu lugá pa e kantidat di hendenan ku ta interesá pa e Pole Dance. I mas ainda e interes na Kòrsou ta grandi pa siña Pole Dance.
Djis sigui purba
Pa e hóben ku tin un deseo, un gana, kreatividat pa hasi algu, Jennifer ta bisa ku “tur hende tin un tiki kreatividat den nan. Si bo tin gana di hasi algu bai hasié. Kisas bo no ta bon den dje pasobra mi tambe ora mi a kuminsá, mi a pensa no ta algu ku mi por hasi pero si bo tin gana, miéntras bo ta bai, bo ta bira mas mihó. Bo mes tin di perseverá, purba pa logra algu. Esei ta algu importante pa no entregá pasobra e promé bia no a bai bon. Sigui purba”.
Kiko ta Pole Dance
Pole Dance ta kombiná baile i akrobasia riba un bara vertikal. E bailenan aki no ta tuma lugá solamente den klupnan di hende hòmber pero tambe komo baile eksótiko. Pero na mes momentu e ta un forma di hasi ehersisio. E ta un baile pa tur hende pero mas ku tur un forma di akrobasia pa adulto. E uso di bara pa deporte i ehersisio ta bai bèk 800 aña pasa komo un deporte tradishonal di indionan di Mallakhamb ku tabata usa forsa na un bara di palu. Despues a sigui e Pole chines den siglo 12 ku tabata usa dos bara kaminda e hòmbernan tabata hasi trikinan peligroso. Na Amérika e baile a hasi su entrada den1890 ora Little Egypt a introdusié den nan shownan ku nan tabata efektuá durante di nan biahenan i e tabata yama Kouta Kouta òf Hoochie Hoochie ku e bailarinnan Dhawazi tabata baila. Na 1920 bailarinnan a introdusí e Pole den su forma sensual pero tambe usando un bara di palu, pa asina nan atraé e multitut.
