CARACAS, AP.- Sentenar di polis a blòkia un mobilisashon enkabesá pa ansianonan ku kier a yega na sentro di Caracas, pidiendo mehorashonnan ekonómiko pa esnan ku a baha ku penshun i pa rechasá Asamblea Konstituyente, kual ta loke presidente Nicolás Maduro kier reformá e karta magno kuné.
Vários manifestante a marcha desde parti ost di e siudat pero no a logra yega na sede di defensor di Pueblo.
Despues di pasa den vários kaya e manifestantenan a wòrdu blòkiá pa sentenar di polis ku yudansa di dos trùk antimotin ku a pone bareranan di metal di mas di dos meter haltu pa impedí e avanse di manifestantenan. Algun a forsegeá ku polis, kende mester a usa gas lakrimógeno pa kalma e manifestantenan.
“Nos a pasa 18 aña ku gobièrnunan chavista, a bira ora pa nan sali. Nos no ta bai keda ketu mas pa Maduro i muchu ménos su Konstituyente”, segun afirmashon di Mirian Chacon, un señora di 53 aña.
Desde komienso di e protestanan na final di mart, forsanan di seguridat a blòkia tur mobilisashon opositor rumbo pa sentro di Caracas.
E visepresidente di e partido ofisialista, diputado Diosdado Cabello, a afirmá ku Maduro lo sigui ku e proseso konstituyente apesar di preshon di oposishon, kual el akusá di promové akshonnan violento i “terorismo”. Cabello a bisa den un konsentrashon den estado oriental di Monagas ku oposishon “no ta bai bolbe goberná e pais aki nunka mas”.
