ORANJESTAD.-Awe djabièrnè a tuma lugá e para eskolar na Aruba. Den e marcha aki muchanan di skol ta dibertí i gosa di karnaval den nan ambiente di skol. Na Kòrsou ta otro siman muchanan di skol ta marcha den kaya i mas atardi riba e mesun djabièrnè lo tin e parada di tiner (teener parada). Polis ku tabata presente pa guia e marcha, na dado momentu mester a aktua kontra di hóbennan ku a kuminsá bringa.
Polis di Aruba ta informá ku awe mainta tabatin parada eskolar na diferente distrito rònt Aruba. Kuerpo Polisial tabata presente pa ku e órden públiko y siguridat. Diferente timnan di polis tabata presente pa asina pèrkurá pa e seguridat di tantu partisipante komo esnan ku a bai pa wak e parada.
Polisnan presente tabata Mobiele Eenheid (ME), polis uniformá, polis di bario, K-9, SBV, planologie, OCC, y Flex team.
Na komienso di e parada, na Avenida Milio Croes a surgi un bringamentu entre algun hóben. Mesora polis a presentá i a detené esnan konserní. Ta trata di dos menor di edat (ámbos maskulino) ku a keda detené i ora a listra nan a topa ku arma blanku den nan poder. Nan tabatin “boksbeugel” i sambèchi.
Kuerpo Polisial un biaha mas ta kòrda tur hende ku nos ta drentando e último simannan di Karnaval na unda nos ta pone énfasis riba e kontrolnan i tambe polis tei pa e seguridat pa kada persona ku lo ta sea den parada òf na banda.
Kòrda FAYA BO HAYA ta bai ta na vigor komo tambe kontrolnan den tráfiko promé durante y despues di kada parada.
Si bo ta bebe bo stür. Pèrkurá pa bo tin Bo Amigu Responsabel. Un tráfiko sigur ta responsabilidat di nos tur.
