WILLEMSTAD – Awe alrededor di 04.06 or di mardugá, Sentral di Polis a haña notifikashon ku lo tin un kaso di atrako ta tumando lugá den un kas den área di Moontjeweg. Mesora sentral di polis a dirigí unidatnan polisial na e sitio. Na yegada di e unidatnan polisial na e sitio, nan a rondoná e kas i a señalá e sospechosonan den e kas. Siguiendo ku e investigashon e agentenan a bin haña e kuater sospechosonan (4) skondí den un kamber di e kas kaminda nan a keda detené. For di un investigashon preliminar ku polis a realisá na e sitio a resultá ku e sospechosonan, dos ku arma di kandela a sorprendé e sinku(5) miembronan di e famia i bou di menasa ku e arma di kandela tabata pidi e famia pa sèn kèsh.
E hòmbernan sospechoso detené ta:
*F.S.M.B. di 21 aña di edat;
*A.J.D. di 24 aña di edat;
*Ch.M.G.V. di 22 aña di edat i
*K.J.V. di 14 aña di edat, tur nasé na Kòrsou.
Durante nan detenshon polis a haña i konfiská dos arma di kandela, muts, hanskun i un tas ku sèn kèsh. A presentá e kuarteto dilanti un Fiskal Ouksiliar ku a ordená nan enkarselamentu pendiente di mas investigashon.
