WILLEMSTAD – Djasabra 25 di desèmber 2021 alrededor di 23.29’or di anochi, Sentral di Polis a risibí diferente yamada di un kaso di tiramentu ku a tuma lugá na un adrès den Kaya Fin Fin.

Mesora Sentral a dirigí diferente unidat polisial na e sitio i na nan yegada, nan a bin topa un hòmber drumí abou dilanti kurá di un kas i ku herida di bala na su kabes. E hòmber aki ya no tabata duna señal di bida.

Personal di ambulans ku a presentá na e sitio no por a hasi nada mas pa e víktima.

Dòkter di polis ku despues tambe a yega na e lugá di insidente, a konstatá morto di e hòmber Ashley Flaneur nase na Kòrsou 10 di ougùstùs 2001.

Mas o ménos 01.30’or di djadumingu 26 di desèmber 2021, e hòmber sospechoso R.S.S. di 20 aña di edat nase na Kòrsou a presentá na warda di polis na Rio Canario i duna di konosé ku e lo ta responsabel pa e kaso di tiramentu lamentabel ku un ratu promé a tuma lugá den Kaya Fin Fin.

El a tuma e arma for di e víktima ku ta su bon amigu i aksidentalmente un tiru a sali i herida su amigu mortalmente.

A detené e sospechoso aki i present’é dilanti di un fiskal ouksiliar ku a ordená su enkarselamentu pendiente di mas investigashon.

LAGA UN KOMENTARIO

Please enter your comment!
Please enter your name here