ORANJESTAD.-Polis di Aruba ta informá ofisialmente ku a rekonosé e víktima di asesinato den e kaso ku a tuma lugá na Solito. E investigashon profundo ta kanando ketu bai den e kaso di asesinato aki. Kuerpo polisial ta informá ku den oranan lat di ayera tardi a identifiká e víktima di e kaso di djasabra, unda a haña un kurpa sin bida den un kas na Solito.
Ta trata aki di e víktima Luz Divina Faña Paulino nase dia 7 aprel 1965 (60 aña di edat) di Repúblika Dominikana. Polis di Aruba ta hasi un apelashon na kualke persona ku sa algu òf a wak algu, pa yama e tiplijn di polis 11141. Ta garantisá ku bo ta keda ANONIMO.
Manera EXTRA a informá anteriormente, djadumingu último outoridatnan a bai na un kas na Solito. Polis tékniko, recherche y tambe dòkter forénsiko a presentá na e sitio pa asina hasi nan debido investigashon. Durante di e investigashon a konfiská diferente artíkulonan na e kas.
