WILLEMSTAD – Awe mardugá alrededor di 2:30 am polis a los bala di atvertensia pa motibu di un situashon basta pekuliar. Ta asina ku polis mester a bai den Kaya Aquamarin den Kura Piedra ya ku tabatin un outo ta hasi maniobra straño riba e tereno pafó di e skol einan. Na yegada di e patruya mesora a bai pa hasi investigashon di e outo en kuestion. Para ta atendé ku e shofùr direpente un otro outo a kore bin violentamente i dal den esun ku polis tabata atendiendo. Esaki por poko a kousa danjo persona pa e polisnan i e shofùr na e sitio. E shofùr ku a kousa e aksidente lo a sali bai patras na su baul ku intenshon pa saka algu. Polis a sinti nan mes menasa i mesora a los tiru di atvertensia pa para kualke intenshon di e persona. Mesora a bai na detenshon di ámbos shofùr. Tabatin basta daño material. No ta konosí kiko a kondusí na lokual a tuma lugá. A hiba ámbos warda di polis na unda nan lo duna kuenta i rason i pa trese mas klaridat den e situashon ku a surgi na Kura Piedra awe mardugá. TOD tambe a yega na e sitio pa hasi nan investigashon.
