E eks-prens Andrew, ruman di Rei Charles, ku ayera a keda detené durante di algun ora.
SANDRINGHAM, Gran Bretaña (AFP).- Polis ayera a arestá e eks-prens Andrew -ruman di Rei Charles- pa “sospecha di mal kondukta den ehersisio di un funshon públiko”, relashoná ku e kaso Epstein, tempu ku e eks-prens tabata representante spesial di Reino Uní pa Komersio Internashonal. E aresto, sin presedente den historia di e famia real, a koinsidí ku e 66 kumpleaño di Andrew.
Polis lokal di Thames Valley, kaminda tin e residensia Royal Lodge den kua Andrew te ku poko tempu pasá tabata biba, a konfirmá den un komunikado dje detenshon. “Komo parti dje investigashon, awe nos a arestá un hòmber di den kareda di sesenta aña di Norfolk bou di sospecho di mal kondukta den ehersisio di un funshon públiko”, segun polis a indiká. Manera ta kustumber den e pais, no a menshoná nòmber dje sospechoso. Algun ratu despues a anunsiá ku e sospechoso a rekobrá su libertat.
Relashoná ku e informashon, Rei Charles III, ruman mayor di Andrew, a ekspresá su “preokupashon profundo”,agregando ku “hustisia mester kana su kaminda”. Despues, manera tabata planiá, e rei a akudí na sentro di Londres pa inougurashon di Siman di Moda dje kapital britániko.
E prens heredero, William, i su kasá Catherine, a opta di su parti pa diskreshon i solamente a bisa di ta “apoyá” posishon dje rei den e kaso aki.
E komunikado di polis a informá ku a listra den dos direkshon na Inglatera, relashoná ku e aresto. BBC a informá ku un tabata un kas bieu di Andrew, Royal Lodge, den Windsor, ku ta keda na parti wèst di Londres. E otro lo ta su residensia for di e luna aki den un finka na Sandringham, propiedat dje rei, na Norfolk, kaminda su aresto a tuma lugá.
Dia 11 di febrüari a surgi dokumentonan nobo ku parse di ta indiká ku e ruman di Charles, awor konosí komo Andrew Mountbatten-Windsor, a pasa informashonnan konfidensial na e delinkuente seksual Jeffrey Epstein.
