LONDON, REINO UNI, AFP.- Polis britániko a bisa djaweps ku nan a aktua “sin miedu ni fabor” durante e investigashon di vários fiesta riba Downing Street den temporada di Lockdown. Vários a kritiká ku Promé Minister Boris Johnson a haña solamente un prosèsverbal despues ku el a bishitá mas ku 1 evento.
Polis Metropolitano di London, kual a kondusí e investigashon yama skandal di “Partygate”, a parti mas di 100 prosèsverbal pa desénas di sivil i polítiko.
“Nos no a ninga di emití niun prosèsverbal”, segun komisario interino Stephen House na un komité di supervishon di Asamblea di London, insistiendo ku no a tene kompashon ku Johnson.
“Mi no ta preokupá mi kabes ku loke promé minister ta pensa. Mi ta hasi mi trabou sin miedu ni fabor”.
El a hasi e komentarionan aki un dia despues ku un investigashon interno a konfirmá tabatin un kantidat di reunionnan ilegal riba Downing Street, kaminda e personal a arohá, bringa i insultá limpiadónan i bewakernan.
E publikashon di e informe aki, kual a inkluí imágennan di Johnson brindando na un evento kual e no a haña prosèsverbal p’e, a renobá preshon riba e lider pa e renunsiá.
