LONDON, AP.- Polis na London ta investigando un abusu seksual di 2008 vinkulá ku e aktor Kevin Spacey, segun informashonnan di djabièrnè. Esaki ta e gòlpi mas resien pa e astro di “House òf Cards”.
Polis no a identifiká Spacey na su nòmber, pero a bisa ku unidat di ofensa seksual ta investigando e denunsia di violashon ku a wòrdu risibí algun dia pasa. The Sun i otro medionan britániko a informá ku Spacey e persona ku ta wòrdu investigá.
The Sun a bisa ku e denunsia nobo a wòrdu presentá pa un hòmber ku tabata riba binti aña. Polis Metropolitano di London a bisa den un komunikado ku ta investigando un agreshon di 2008 na Lamberth, na sùit di London.
E entidat a afirmá ku no ta identifiká personanan ku por òf no por ta parti di un investigashon. Na momentu ku a puntra si polis ta investigá Spacey, un bosero a pidi detaye tokante e supuesto insidente i n’e momentu ei a proporshoná e komunikado.
Den kasonan manera esaki, polis di London no ta kontesta preguntanan tokante individualnan pero mas bien riba insidentenan. Spacey no a wòrdu detené ni akusá di un krímen. Su publisista no a rospondé mesora na un e-mail buskando komentario.
E aktor di 58 aña tabatin un presensia prominente na London pa mas di un dékada komo direktor artístiko di teatro Old Vic.
E reputashon di e ganadó di dos Premio di Akademia a sufri dos daño grave fin di siman na momentu ku BussFeed News a reportá ku e aktor Anthony Rapp a bisa ku Spacey a purba sedusié na 1986, na momentu ku Rapp tabatin 14 aña.
