E outo ku a usa pa e atake
BERLIN, ALEMANIA, AFP.- Polis aleman a informá djadumingu ku el a tira e sospechoso prinsipal di e atake islamita ku a sosodé un anochi promé serka di e desfile di Pride na Berlin. Esaki tabata e atake di mas resien ku un vehíkulo, registrá den e pais.
E atake a sosodé djasabra anochi, i tabata e promé dirigí kontra e komunidat di LGBTQ den e kapital aleman. Un dama a muri i 29 persona mas a resultá herida.
Polis di Berlin a informá riba X ku a lokalisá e sospechoso prinsipal, Abdul Ballout, di 21 aña, den un zona den distrito di Spandau, na wèst di e siudat, alrededor di 6or di atardi.
Segun polis, Ballout a kore bin riba e agentenan ku un arma blanku. Polisnan a tir’e i e sospechoso a muri na e sitio, apesar di intentonan pa reanim’é.
Un ratu promé, outoridatnan a informá ku Ballout, un siudadano aleman di orígen libanes, tabata sostené e grupo Estado Islámiko (EI). Ademas, e tin vários antesedente penal, esun mas resien ta den luna di mei.
E atake di djasabra a pone fin na un dia di selebrashon pa míles di persona riba kaya. Esaki ta un di e eventonan di mas grandi di Pride na Europa.
