WILLEMSTAD – No opstante ku krímennan di impakto haltu ta mustra un tendensia di ta bahando, Kuerpo Polisial tin atenshon pa aktividatnan kriminal kometé prinsipalmente kontra di turistanan ku ta bishitá nos isla.

Aparte di atrako, ku sierto regularidat malechornan ta kibra den outonan di e wéspetnan aki i bai ku artíkulonan di balor i dokumentunan di biahe.

E situashon aki no ta aseptabel i Kuerpo Polisial huntu ku Politur lo bai reforsá e áreanan vulnerabel ku turistanan ta frekuentá, ku e fin pa pone man riba e delinkuentenan aki.

Unidatnan di e dos entidatnan aki lo bai ta mas visibel den e áreanan turístiko i kaminda ta nesesario lo hasi uso di otro métodonan pa hasi e posibilidat di gara e antisosialnan mas grandi.

Polis lo aserka organisashonnan den e sektor turístiko tambe, pa wak kon huntu por traha di un manera mas efektivo riba prevenshon di un banda i alabes konsientisashon di e bishitante di nos isla.

No ta e intenshon pa krea pániko bou di turistanan, pero mester evitá si, ku e poko mal eksperensianan ei, ta kontribuí na un mal propaganda pa nos pais.

Hustisia lo sigui sòru pa protekshon di kada siudadano pero tambe esun ku ta skohe Kòrsou komo su destinashon di vakashon.

LAGA UN KOMENTARIO

Please enter your comment!
Please enter your name here