WASHINGTON, MERKA, AFP.- Un polis koló kla a keda akusá ku asesinato despues ku el a tira un hòmber koló skur desarmá mata den estado di Ohio na Merka.

E asesinato di Andre Hill algu promé ku Pasku den siudat di Columbus a kousa un ola nobo di protesta kontra violensia di polis kontra afroamerikanonan den e pais.

Adam Coy (47), e ofisial di polis blanku ku a tira Hill 22 di desèmber a keda arestá i akusá ku asesinato djárason segun indikashon di outoridat.

Coy a haña retiro di polis di Columbus den yanüari. E i un otro agente a akudí na un yamada no urgente tokante un vehíkulo sospechoso na momentu ku nan a topa Hill saliendo for di garashi di un amigu ku el a bishitá.

E imágennan di kámara di polis di Coy a mustra Hill aserkando e ofisialnan ku un telefòn den su man robes. Su man drechi n tabata visibel.

Despues di algun segundo, Coy a kuminsá tira i e ofisialnan no a brinda yudansa inmediato na e hòmber kende tabata muriendo.

Morto di Hill a sosodé algun siman despues di asesinato di un otro hòmber pretu desarmá, Casey Goodson Jr., di 23 aña. Ayudante di e shèrif di Columbus a tir’é na momentu ku e tabata yegando kas despues di a kumpra pan.

Protestanan pa hustisia rasial i kontra violensia di polis a ekstendé den Merka den verano último despues di George Floyd su morto, un hòmber koló skur asesiná pa un polis koló kla di Minneapolis, Minnesota.

Lo huzga e ofisial, Derek Chauvin 8 di mart próksimo.

 

LAGA UN KOMENTARIO

Please enter your comment!
Please enter your name here