WILLEMSTAD – Kuerpo Polisial a tuma nota di algun skuter eléktriko ku ta move riba kamindanan públiko. E personanan ku ta kore e skuternan aki ta move hopi bia den grupo riba nos kareteranan.
Sigur den oranan di anochi polis ta konstatá ku e vehíkulonan aki ta wòrdu manehá di forma hopi iresponsabel, poniendo tráfiko na diferente okashon na peliger.
Ta bon pa enfatisá ku shofùr di e skuternan eléktriko aki, ku no ta kore mas duru ku 40 kilometer pa ora, mester kumpli ku entre otro e siguiente eksigensianan:
Seguro bálido;
Plachi di number parti patras (impuesto pagá);
Téknikamente den bon kondishon (no nesesariamente mester ta di kùr);

E shofùr mester tin un identifikashon bálido huntu kuné ku kua e por identifiká su mes na momentu ku polis eksigí esaki.
Ademas ta importante pa shofùr di e skuternan aki realisá nan mes, ku una bes nan ta partisipá den tráfiko, nan mester kumpli ku tur regla di tráfiko.
Den kaso di violashon di nos lei di tráfiko, lo aktua di forma represivo kontra di esaki.

LAGA UN KOMENTARIO

Please enter your comment!
Please enter your name here