Dama di 51 aña detene den e kaso aki
WILLEMSTAD – Djasabra 11 di òktober 2025 alrededor di 07.00’or a base di investigashon ku personal di reshèrshi ta hasiendo den e kaso di asesinato ku a tuma lugá den mardugá di 10 di òktober 2025 den Saliña, Tim di Aresto i e personal investigativo a bai na San Pedro, na unda e sospechoso tabata.
Na momentu ku el a tuma nota ku e ta bai wòrdu detené, el a pone e arma di kandela ku e tabatin den su poder na su kabes, i a lòs un tiru ku a alkans’é na su kabes.
Mesora polis a yega serka i a pidi ambulans pa presentá na e sitio, pa stabilis’é i dun’é promé asistensia.
Tin indikashon ku ta for di anochi e tipo sospechoso aki tabata skonde riba vlakte di San Pedro. Un siudadano ku a tuma nota di e hòmber aki a trata na aserk’é i konvensé pa entrega su mes pero lamentablemente esaki no tabata e kaso.
Despues el a keda transportá pa Sala di Emergensia di C.M.C.
Ta trata di e hòmber sospechoso R.V.R. di 36 aña di edat nasé na Kòrsou.
Bosero di polis a konfirmá ku te na e momentu nan aki ku nos ta publikando e artíkulo aki, e hòmber sospechoso ta na bida ainda.
Ademas relashoná ku e kaso di asesinato aki, polis a realisá un detenshon.
Djasabra 11 di òktober 2025 alrededor di 01.35’or, polis a detené e dama M.M.M. di 51 aña di edat nasé na Kòrsou.
Su detenshon ta relashoná ku posibel komplisidat den e kaso di asesinato i a tuma lugá na un adrès den Kaya Tor van de Linde.
E kaso ta sigui den investigashon.
update:
Djis un ratu pasa a drenta e informashon ku e homber sospechoso di asesinato a fayese na CMC.
