WILLEMSTAD – Polis ta alertá siudadanonan i kompanianan ku ta hür skuter ku e tim ku ta enkargá ku investigashon di ladronisia di vehíkulo a tuma nota di un oumento resientemente den ladronisia di skuter. Segun Polis, skuter ta un di e vehíkulonan ku ta mas preferí, prinsipalmente bou di hóbennan i personanan estranhero. E oumento den e tiponan di kaso a motivá polis pa hasi un yamada públiko na propietarionan di skuter tuma mas medida di prekoushon.
Polis ta rekomendá pa no laga un skuter simplemente pará na kualke lugá, spesialmente den lugánan skur, alehá òf kaminda tin tiki kontrol. Segun Kuerpo Polisial, un bon sistema di seguridat por hasi e trabou di un ladron muchu mas difísil.
Entre e medidanan ku Polis ta rekomendá ta instalá un bon lòk riba e skuter i, kaminda ta posibel, ekipá e vehíkulo ku un sistema di GPS. Esaki por yuda oumentá e seguridat di e skuter i tambe por duna informashon importante den kaso ku esaki keda hòrtá.
E yamada no ta solamente pa propietarionan privá. Polis ta pidi tambe kompanianan ku ta hür skuter pa presta mas atenshon na kaminda i kon nan vehíkulonan ta wòrdu stashoná i protehá, spesialmente ora nan no ta den uso.
Ku e kantidat grandi di skuter ku ta wòrdu usa diariamente, Polis ta enfatisá ku prevenshon tin un papel importante den e lucha kontra e tipo di ladronisia. Un vehíkulo ku ta keda fásil pa alkansá i sin protekshon por bira mas atraktivo pa malechor.
Kuerpo Polisial ta bisa ku e ta sigui kombatí krímen riba nos isla ku tur forsa, pero e ta enfatisá ku siudadanonan mes tin un papel importante den hasi e trabou di malechor mas difísil. E mensahe di Polis ta simpel: “no warda ku algu mester sosodé promé ku bo tuma medida. Un bon lòk, un lugá mas sigur pa stashoná i un sistema di GPS por yuda protehá un skuter kontra ladronisia.” Polis ta pidi un biaha mas pa tur propietario i kompanianan di hür pa tuma e alerta na serio i hasi tur loke ta posibel pa evitá ku nan skuter bira e siguiente blanko di ladronisia.
