WILLEMSTAD – Polis di Punda, huntu ku Departamento di Joyriding, a logra lokalisá tres skuter hòrtá skondí den un kas bandoná na Tumbastraat den Koraalspecht. No muchu tempu pasá tabatin un robo na un negoshi spesialisá den benta di skuter, kaminda segun informashon ku polis tin, un total di kuater skuter lo a keda hòrtá.
Durante investigashon polis a yega na e kas bandoná aki na Tumbastraat. Einan nan a bin topa ku tres skuter skondí den e kas, ku ta sospechá ta parti di e skuternan ku a keda hòrtá durante e robo.
Polis a pidi asistensia di TFO pa akudí na e sitio i hasi investigashon tékniko riba e skuternan. E intenshon ta pa wak si por haña rastro ku por yuda identifiká e persona òf personanan envolví den e ladronisia.
Despues di e investigashon na e sitio, polis a transportá tur tres skuter pa Warda di Polis pa sigui ku investigashon.
Segun informashon, un di e kuater skuter ku lo a keda hòrtá ainda no a ser lokalisá. Polis ta sigui ku investigashon pa determiná ken ta tras di e robo i pa trata di haña e skuter ku falta.
