WILLEMSTAD – Polis a los bala riba un outo Hyundai shinishi sospechoso awe den oranan di mainta na Seru Fortunaweg, despues ku e shofùr supuestamente a manda e vehíkulo riba polis ora nan a purba par’é.
E insidente a kuminsá despues ku polis mester a bai na un kompleho di apartamento riba Seru Fortunaweg pa un posibel kiebro. Na yegada, polis di Rio Canario a mira un outo sospechoso i a purba par’é.
Segun informashon ku EXTRA a risibí, en bes di para, e shofùr a manda e outo den direkshon di polis. Mesora polis a aktua i a los bala riba e vehíkulo. A pidi yudansa di mas patruya.
Despues di esaki a kuminsá un persekushon, ku na un momento dado a sigui na pia. Polis a logra detené un sospechoso den área di Dein, miéntras ku un otro sospechoso a keda detené riba Seru Fortunaweg.
E patruya ku normalmente ta transportá prezu tambe a akudí na e sitio. Riba kaminda e patruya a topa kara kara ku un di e sospechosonan i a logra hasi un di e detenshon nan.
Tur dos a keda hibá Warda di Polis pa interogashon, miéntras ku e outo envolví den e insidente a keda konfiská pa investigashon. Un supuesto di tres sospechoso ainda ta ser buská.
Segun informashon, por lo ménos un di e balanan ku polis a los a alkansá e outo. No tin informashon ku algun persona a resultá heridá.
Ku e tremendo akshon aki, polis a logra detené dos sospechoso i frustrá loke ta investigando komo un posibel intento di ladronisia na e kompleho di apartamento.
