Oponentenan di gobièrnu venezolano dje presidente interino Delcy Rodriguez, ta enfrentá polis durante di un demostrashon ayera pa eksigí oumento di salario i penshun.
CARACAS (AFP).- Polis venezolano ayera a usa gasnan lakrimógeno kontra di manifestantenan ku tabata protestá pa mihó salario den un marcha ku tabata buska pa yega e palasio presidensial di Miraflores. Tipo di manifestashon manera esun di ayera durante di kasi dos aña no a tuma lugá na e pais despues dje fuerte represhon militar kontra di esnan ku tabata kuestioná e reelekshon di Nicolas Maduro den 2024.
Ayera, den kareda di 2.000 trahadó a subi kaya pa rechasá un promesa di oumento salarial hasí un dia promé di parti dje presidente interino Delcy Rodriguez, kende no a duna e porsentahe dje oumento i tampoko a papia riba prestashon òf otro benefisionan. “Nan tin miedu ku e pueblo ta yega Miraflores! “Pero nos ta bai Miraflores”, segun e manifestantenan tabata grita.
Desena di polis anti motin a stroba e avanse dje manifestantenan i a usa gas lakrimógeno i eskudo den sentro di Caracas, na poko kilometer for di Miraflores.
Salario mínimo na Venezuela ta di 130 bolivar (0.27 dollar) kontra di un inflashon anual ku ta superá 600%. I ounke e entrada por yega te na 150 dollar ku bónus estatal den prestashon i otro benefisionan, esei ta nada si tene kuenta ku e 645 dollar ku un makutu básiko di kuminda pa un famia.
E mandatario Delcy Rodriguez djárason a primintí un “oumento responsabel” di salario, den un pais gòlpiá pa inflashon króniko i e dramátiko kaida di ekonomia den e último dékada.
