WILLEMSTAD.- No tin niun kaso di violashon nobo do niun stagiere! Di forma kategóriko bosero polisial sr.Imro Zwerwer a reakshoná riba preguntanan di EXTRA tokante informashonnan ku ta sirkulá riba retnan sosial den kua ta indiká ku lo tin un kaso nobo den kua un hòmber lokal lo a violá un dama stagiere. Asta a indiká ku polis a detené e sospechoso mientras ku e dama a bai Ulanda bek, pero tòg for di su sel e sospechoso lo ta app ku e dama i intimid’e.
E informashon riba retnan sosial i ku asta algun medio di komunikashon a duna atenshon na dje, ta saká kompletamente for di konteksto. E bosero polisial a sigui splika EXTRA ku no tin nada di violashon. E kaso ta esaki; e sospechoso konosé e víktima i nan dos tin un relashon di amistat ku otro. Na dado momentu algu a sosode entre e dos personanan, posiblemente e relashon a kibra i e sospechoso a bai kaminda e dama ta keda/biba i einan el a kousa destrukshon i tambe el a maltratá e dama. Despues di su akto di maltrato i destrukshon el a bai for di e sitio, pero djis despues polis a detené. A detené pa destrukshon i maltrato i no pa violashon.
Na momentu di su detenshon tabatin un prosedura normal kaminda ku a presentá e sospechoso dilanti di un fiskal ouksiliar. A kita tur pertinensianan personal for di dje i a entrega esaki na e fiskal ouksiliar. Sr. Zwerwer ta splika mas aleu ku e ta kere ku e fiskal lo a lanta un ratu i esei tabata e momentu ku e sospechoso a logra kue su telefon riba mesa di e fiskal i a kuminsá app entre otro ku e víktima. Pues no ta asina ku e sospechoso tabata den sel di polis den poder di telefon te pa e app ku e víktima.
E bosero polisial no ta na altura di e víktima a bai Ulanda òf no.
