WILLEMSTAD – Djaweps 19 di desèmber 2024 alrededor di 00.54’or, Sentral di Polis a risibí informashon di un aksidente basta serio ku a tuma lugá riba Schottegatweg-Oost na altura di Kaya W.F.G. Mensing.
Na yegada di e unidat polisial, el a topa ku un vehíkulo ku a aksidentá kontra di un palu di lus di tráfiko. Alabes den e vehíkulo tabatin kuater persona heridá, di kua e okupante ku tabata sintá banda di e shofùr ya no tabata duna señal di bida.
For di investigashon preliminar a sali na kla ku e vehíkulo aki tabata kore riba Schottegatweg-Oost den direkshon di Punda riba un velosidat haltu.
Pa motibunan te ainda deskonosí, dado momento el a dal den e asera na banda drechi i despues pèrdè kontròl, kita na man robes i bai dal kontra di un palu di lus di tráfiko.
E shofùr a sufri heridanan di gravedat i a keda transportá ku ambulans pa sala di emergensia den situashon krítiko.
E okupante ku tabata sintá banda di e shofùr, a fayesé na e sitio debí na e multiple leshonnan ku el a sufri.
Ta trata di e dama Thishaily Esmatil Olivo Rodriguez di 16 aña di edat nasé na República Dominicana.
Dos otro okupante sintá patras den e outo tambe mester a risibí tratamentu médiko.
Investigashon den e kaso ta kontinuá.
