WILLEMSTAD.- Dia pa dia mundu ta sigui bira mas moderno. Esaki ta nifiká tambe ku e mundu digital kada dia ta bini mas dilanti i kada biaha mas inovashon den e mundu digital.
Despues di algun tempu di preparashon awor outomobilistanan lo tin nan pólisa di seguro di outo di un forma digital riba nan telefòn.
Durante di un konferensia di prensa ku a tuma lugá ayera, representantenan di INSight Insurance Platform kende ta esnan ku a desaroyá i karga e proyekto huntu ku e instansianan ku di un forma òf otro tambe ta envolví den e proyekto aki a presentá e inovashon aki.
Segun Sr. Renato Ignacio Direktor di INSight Insurance Platform, kuminsando e luna aki mes lo introdusí e karchi digital di seguro pa vehíkulo. Esaki lo fasilitá e kontròl di tráfiko i na instansianan. Pa medio di un app ku lo ta riba tur telefòn, Forensys, CRS,Wegenwacht 24/7, ontvanger i polis por scan e kódigo QR i mesora por averiguá tur dato. Asina e proseso di balidashon lo ta efikas i e kooperashon entre kompanianan di seguro i outoridatnan lo ta mas direkto. E kompania di seguro ta traha e karchi (pólisa di seguro) digital i ta fásil pa “download” esaki riba telefòn di e asegurado. Asta sin konekshon di Internet e karnèt semper ta aksesibel.
Ta trata di un inisiativa di kompanianan di seguro ku kolaborashon di outoridatnan. Na promé lugá e kompania di seguro Guardian Group Fatum, ENNIA, Citizens, Seguros Brouwer i BSure lo implementá e proyekto. Ku esaki ke promové digitalisashon mas aleu di Kòrsou pa den e temporada benidero nos isla por profilá mihó.
Den futuro lo ta posibel pa añadí otro datonan tambe na e sistema, manera datonan di keuring i kantidat di aña sin daño. Pronto mas kompania di seguro tambe lo bai partisipá na e inisiativa akí.
