WILLEMSTAD.- Ayera mainta nèt na momentu ku reshèrshinan ku ta atendiendo ku kasonan di robo den bibienda parti pariba tabata preparando pa tene entradanan hudisial, nan a haña informashon ku tin un persona sospechoso ku a drenta den un kura di kas den Kaya Jonas ku ménos bon intenshon. Vários unidat polisial a dirigí nan mes pa e adrès aki.

Na nan yegada a bula den kura i a kuminsá buska. En bèrdat a topa ku un persona den e kura, pero ta trata aki di un persona ku ta hasiendo algun trabou pa e doño di kas. E doño di e kas tambe tabata presente i a mustra su gratitut na e agentenan ku a aktua mesora apesar ku no tabatin nada robes tumando lugá.

Esaki ta duna indikashon ku e agentenan spesialmente e tim ku ta trahando riba kasonan di kiebro den bibienda, ta mobilisá mesora. Esaki sigur awor ku kiebro den bibienda i negoshinan den áreanan parti pariba a lanta kabes hopi. Bisiñanan mes tambe ta hopi mas atento i ta bati alarma mesora na momentu ku nan tuma nota di moveshonnan sospechoso.

Na momentu ku e agentenan tabata na e kas aki, nan a keda aserka pa otro bisiñanan ku ta man na kabes i ku tambe a bira víktima di ladronisia durante dianan tras di lomba.

LAGA UN KOMENTARIO

Please enter your comment!
Please enter your name here