VARSOVIA, Polonia (AFP).- E presidente di Polonia, Karol Nawrocki, a anunsiá ku ta retirá e máksimo kondekorashon di su pais konsedé na e presidente ukraniano, Volodimir Zelenski, kende a batisá un unidat militar na honor di un organisashon akusá di a masakrá míles di polako.
Gobièrnu polako a honra Zelenski den aprel di 2003 ku e órden di Aguila Blanku, e kondekorashon mas haltu dje pais. Sinembargo, e relashonnan a daña pa e desishon di Zelenski pa duna un unidat di Forsanan Armá e nòmber di Ehérsito Insurgente Ukraniano (UPA). Segun Polonia, durante di 2da Guera Mundial UPA a mata den kareda di 100.000 sivil polako den loke aktualmente ta e parti wèst di Ukrania, i ta konsiderá e matansa ei komo genosidio.
“Pa e mayoria inmenso di sosiedat polako, UPA a sigui komo un formashon responsabel di krímennan brutal kometé kontra di siudadanonan di e Repúblika di Polonia durante di Segunda Guera Mundial”, segun Nowrocki a bisa ayera. E kansier ukraniano, Andrii Sibiga, a denunsiá e desishon komo “un eror stratégiko” i “ku falta di rèspèt”. “Solamente Mòsku ta sali ganadó, ku e desishon robes dje presidente polako”, segun el a agregá.
UPA tabata e brasa militar di un movementu independista ukraniano ku a bringa kontra di ehérsito soviétiko, pero ku tambe a enfrentá e resistensia polako i a mata sivilnan polako i hudiu. Mas aleu UPA na algun okashon a kolaborá ku nazinan, pero na otro momento tambe a bai kontra di nazi.
Pero na Ukrania, UPA ta keda honrá komo un forsa ku a lucha pa independensia dje pais, spesialmente for di inisio di 2022 ku e invashon ruso.
