E ta determiná pa bira polítiko i ku bon preparashon. P’esei el a bai studia Bedrijfskunde i Politicologie na Ulanda. Kevin Eustatia Palm a kuminsá su karera den polítika na Kòrsou formando parti di Hóben Goberná. Kevin awe ta forma parti di komishon di konseho pa hóbennan di ministerio asuntunan eksterior na Den Haag.
Komienso
Kevin a kuminsá su karera polítiko den parlamento hubenil Kòrsou na 2018 tempu e tabatin 17 aña. E tabata hopi yòn i hopi kos pa siña. For di e tempu ei poko poko pero sigur el a kana den e arena un tiki mas grandi te awe na Den Haag. El a kuminsá chikí i awor kresiendo na Ulanda. E tabata un hóben ku nunka ta tuma no komo kontesta. Semper e kier a sa dikon algu ta asina, e kier a sa e konteksto profundo di problemanan. Semper komo hóben el a papia i hasi pregunta. Nunka e tabata keda ketu i laga otro bis’e kiko pa hasi. Esei tabata un di e motibunan dikon el a keda atraé na polítiko. Kevin kier a sa dikon kosnan ta manera nan ta i dikon no por ta mihó.
Duna oportunidat
Siendo den parlamento hubenil di Hóben Goberná Kevin ta splika si e ta haña ku el a hasi sufisiente òf por a hasi mas. E hóben aki ta kere ku di un banda komo hóben bo tin di pone bo mes einan i hala atenshon i e generashon mas grandi tin di duna e oportunidat pa hasi. Por ehèmpel hopi bia nan no ta haña oportunidat di e generashon mas grandi pasobra simplemente nan kier a mantené e poder. Si e lo a keda un tiki mas largu e lo tabatin mas efekto pero e lo no ta sigur ku e por a logra mas pasobra e problema di e generashon mas grandi poniendo un muraya dilanti e hóbennan ta keda. Ta esei tin di wak segun Kevin.
No muchu na serio
Kevin ta haña ku e polítikonan di mas edat na Kòrsou no ta tuma nan komo hóben muchu na serio. E ta mira aki i aya algun polítiko ku si ta hasié pero si wak e struktura general nan no ta tuma nan na serio. Pero apesar di esei Kevin no a kibra pero ora el a yega Ulanda el a sigui den e arena polítiko. Manera Kevin a splika, el a bai Ulanda pa e studia Bedrijfskunde i Politicologie i tabata determiná. El a bai ku e meta pa siña polítika i bai bek Kòrsou. For di ora el a yega Ulanda su promé dia di estudio el a ripara kiko e estudio realmente ta i a pone su dilanti ku pa e sinta den banki di skol siña ta bon pa e hasi tambe miéntras e ta studia. E kier a praktiká loke e ta siña den bida real. Esei tabata un di e motivashonnan dikon el a sigui pusha pa drenta.
Influensiá e maneho
Kiko Kevin ke logra pa hóbennan na Ulanda, esei ta otro punto ku el a papia ku nos di Djasabra. Segun Kevin su trabou ta mas bien dirigí riba e paisnan internashonal pero e ta haña importante pa kuminsá mustra Kòrsou, Ulanda i otro paisnan kon e efekto di hóbennan ta. Si hinka hóben den posishon kaminda nan por tin un algu di bisa e lo logra. Den su trabou ta pa e tin influensia riba e maneho internashonal di gobièrnu di Ulanda i na di dos e ke ta ehèmpel pa nos hóbennan. I no solamente ehèmpel pa hóbennan so pero pa generashonnan grandi. Si pone hóben den posishon kaminda e tin influensia hopi kos bon lo bin. E ke hiba e metanan ku el a bai pe i mustra pueblo en general ku un hóben yu di Kòrsou studiante tambe por tin efekto grandi.
E diferensia
Durante di su presensia den Hóben Goberná, Kevin a haña oportunidat di bai Trinidad & Tobago den Model United Nations. El a splika kon e ta mira e diferensia di nan ku nos. Kevin ta bisa ku papia Ulanda su malu i su bon pero gobièrnu di Ulanda ta duna hóbennan vários oportunidat pa tin un bos. Lamentablemente gobièrnu di Kòrsou i di Trinidad i Karibe en general kada pais tin un maneho ku no ta asina habri pa e hóben pero Ulanda si ta duna e hóben hopi lugá pa tin un bos berdadero.
Duna e hóben mas oportunidat
Kevin a bisa ku e ta kere hóbennan mester ta mas envolví. E ta un persona ku ta para hóbennan tin efekto tangibel den e kosnan ku nan ta hasi. Nos tin hopi organisá na Ulanda i Kòrsou i den Reino ku tin oportunidat pa hóbennan pero e hóben ku ta den nan mayoria bia no ta yu di Kòrsou i asta no ta hóben mes. Mester kuminsá promové nos hóbennan pa e stap ei pasobra tin mas oportunidat ku ta kere. Komo nos a lanta den e sistema ku no por hasi nada no ta sigui buska mas aleu, e ta kere ku ta bin pa dal un stap bèk i wak e oportunidatnan ku tin i tin hopi pa e hóben hasi na Kòrsou, na Ulanda i den reino.
Hóben pa hóben
Den su trabou na Ulanda, Kevin a bisa ku e ta un ‘beleidsadviseur’ i ta duna gobièrnu di Ulanda konseho riba nan maneho di kooperashon pa desaroyo internashonal. Gobièrnu di Ulanda ta traha ku paisnan internashonal i mayoria ta den Afrika i nan ta manda proyekto i sèn pa yuda e paisnan. Den e proyektonan ei hopi ta dirigí riba hóbennan i nunka tin un hóben den e sala. Si wak bon ora ta tuma desishonnan i ora di reunionnan Kevin ta sinta i wak rònt i no ta mira niun hóben. E edat promedio ta 52 esta hopi avansá. Si wak bon awor i wak por ehèmpel Afrika mes por mira ku kasi 60% di e poblashon ta bou di 35 aña. Esei ta un kantidat gigante i por mira ku mayoria hende bibando den e kontinente ta hóben. E ilógiko ku tin proyektonan i desishonnan ku no tin un hóben envolví. Un di su trabounan ta pa representá e stèm di e hóben i tambe pa duna konseho kon por hasi un tiki mas struktura i mas signifikativo.
Habrí pa yuda
Kevin a bisa ku e sa bin hopi den kontakto ku hóbennan na Ulanda ku tambe ke hasi algu. El a bisa ku nos kultura ta unu ku semper ke yuda. Ni maske kuantu problema nos komo yu di Kòrsou por tin, semper nos ke duna un man pa yuda un otro hende. Si wak rònt por mira ku tin hopi hóben ke yuda i sostené i duna un man pero lamentablemente no tin masha chèns pa esei. Esei ta un lástima pero si wak bon e yu di Kòrsou ta habri pa yuda.
E kultura den polítika
Kevin ta determiná pa ta den polítika i p’esei el a bai studia politikologia. E ta sinti ku nos grandinan den polítika ta pone muraya pa e hóben. Pero e ta kere ku e promé kos ku mester hasi ta kibra e struktura ku tin aktualmente. Na Ulanda ta yam’é bestuurscultuur, esta e kultura den polítika. Na Kòrsou ta mir’e ku no ta inklusive ètòl i e promé stap ta kibra e kultura ei. E no ta bisa kita tur polítiko ku tin awor aki pero hopi di nan tin hopi aña den polítika i lamentablemente nada nobo a bin for di nan i aki 2 aña nada nobo lo no bin di nan tampoko. I mester kuminsá habri porta pa e hóbennan i e manera pa hasié ta dor di saka un par ku a subi di edat i duna e hóben espasio.
Siña for di chikí manehá sèn
Pa loke ta e hóbennan ku ta bai studia Ulanda, e ta haña ku mester hasi mas pa e hóben ta mihó prepará. Tin hopi kos ku ta siña na Kòrsou pero tin hopi kos ku ainda falta. Aki ta siña di presupuestá, kon pa papia ku Gemeente pero si wak bon na Ulanda mes hopi di e problemanan ku tin no ta keda menshoná. E ta kere ku esei ta algu ku ta nesesario pa implementá den e preparashon. Tin hopi kos ku hóbennan no sa i ku ora yega Ulanda ta dal den dje i ta simplemente no prepará. I e problema di mas grandi ta esun finansiero. Na Kòrsou si bo tin problema ku sèn bo por pidi mama 20 florin òf ‘zo’ pero na Ulanda si bo no tin sèn, ta einan bo a yega. No tin otro kaminda pa yega òf kisas mayornan tin di manda sèn di Kòrsou i e euro ta 2 bia e florin. Kevin ta kere e problemanan finansiero ta algu ku hóbennan no sa kon profundo e ta i unda bes kai den e problemanan e ta keda bira mas grandi. Esei for di yòn tin di siña nos hóbennan. Si duna un tayer un aña òf algun luna promé bai Ulanda, e lo no hasi efekto masha grandi. E ta kere den edukashon for di yòn mester siña e hóben kon manehá sèn pasobra unda bes na Ulanda e sèn ta bula bai manera nada.
Mi kontribushon
E ta en direktiva di ‘opvang commissie’ di Den Haag i a kuminsá yuda hóbennan. E ke hasi mas pasobra el a topa asina tantu problema i unda bes haña e problemanan ei nan lo no sigui bin i e tin hopi kos pa duna e hóbennan. I siendo den e komishon di SSC, Kevin a bisa ku aña pasá el a topa hóbennan i e aña aki tambe e lo topa nan den e promé siman ku nan ta na Ulanda kaminda lo sigui siman intenso di tayernan. E lo siña nan e trikinan pero e ta keda algu difísil pasobra si duna e hóben e splikashon un siman promé e lo no yuda masha, pero e mester ta hinka den edukashon di e mucha.
Moketa
Si bo ta un loko drenta polítika pasobra e no ta fásil i sigur komo hóben. E stima polítika i ta algu importante pero si bo no tin e poder mental pa por sostené i wanta tur e moketanan ku ta bin, e ta bai ta difísil. E semper ta bisa bai pe pero si e no ta pa bo no ta problema.
