WILLEMSTAD.- Kolaboradó di frakshon di MAN den parlamento. Yael Plet ta spera ku presidente di parlamento ta pone e inisiativa di lei pa eliminá deskriminashon den pago di suèldu mínimo mas lihé posibel riba agènda di reunion públiko. Komishon Sentral di parlamento den e siman akí a bolbe trata e inisiativa di lei i no tin nada mas ku ta stroba su tratamentu den un reunion públiko.
Plet ta splika ku e inisiativa di lei ta bai kita deskriminashon den pago di suèldu mínimo. Aworakí hóbennan di 18 aña pa 20 ta kobra 75 porshento di e salario ku e hóben di 21 aña ta kobra pa e mesun trabou. Esaki segun Plet no ta hustu.
E ta splika ku realidat di awendia ta ku kosto di bida haltu, preis di gasolin i tarifa di awa, koriente ta haltu. Ora e hóbennan akí bai supermerkado òf paga nan resibunan di fin di luna no ta duna nan 25 porshento di deskuento pasobra nan suèldu ta mas abou. Esaki miéntras ku hóbennan entre 18 pa 20 aña tambe tin famia ku yu pa kria. Mas aleu Plet ta splika ku pa lei un persona di 18 ta konsiderá un mayor di edat.
“Un persona di 18 aña ta konsiderá pa lei un persona mayor di edat i e mester para responsabel pa tur su aktonan igual ku un persona di 21 aña.” Esaki pa Plet ta otro motibu pa kita e deskriminashon ku ta eksistí den e suèldu mínimo hubenil. E ta sigui mustra ku ta pasobra e inisiativa di lei ta na interes general di pais otro frakshonnan den parlamento tambe a sostené esaki.
Tambe t’asina ku konseho di SER i tantu sindikatonan komo e asosashon di komèrsio i industria, VBC komo representante di doñonan di trabou, a bisa durante un reunion tékniko den parlamento ku a tarda pa bini ku un lei pa eliminá e deskriminashon den suèldu mínimo. “Ta un grupo di mas ku 4 mil hóben ta bai haña un alivio pasobra, ta eliminá deskriminashon pa nan.”
Plet ta enfatisá ku igualdat den sektor laboral ta algu ku partido MAN-PIN ta para p’e. E inisiativa di lei, segun Plet, ta kumpli alabes ku tambe ku resolushonnan di ILO ku ta boga pa pago igual pa trabou igual.
E kolaboradó di frakshon di MAN ta finalisá bisando ku awor ta na presidente di parlamento pa pone e inisiativa di lei mas lihé posibel riba agènda di reunion públiko pa parlamento aprobá e lei i manda esaki pa gobièrnu. E reunion akí lo no tuma lugá mas promé ku elekshon di 21 di mart mirando ku probablemente e siman akí tabata último siman di parlamento a reuní promé ku elekshon.
Despues di elekshon tin henter luna di aprel ku parlamento por reuní promé ku e parlamento nobo sinta na luna di mei awor.
Foto:
Yael Plet
