WASHINGTON (AFP).- E popularidat di presidente merikano Donald Trump a kai na nivelnan hopi abou, esei gran parti pa motibu di su guera den Iran. Pero su kontròl riba kandidatonan republikano den estadonan ta sigui ta fuerte, den pleno elekshonnan. Faltando ménos ku seis luna pa elekshonnan parlamentario, krusial pa e di dos i último etapa di su mandato presidensial, entre 6 i 7 norteamerikano di kada 10 no ta di akuerdo ku su polítika, segun diferente enkuesta. Partikularmente esaki tin di aber ku kosto di bida ku ta sigui subi.
Pero e núkleo duru di votadónan republikano ta mustra un lealtat hopi fuerte, i e elektornan dje movementu MAGA (Make America Great Again) ta esnan ku ta mobilisando pa saka e representantenan i senadornan ku a mustra rebeldia kontra e agènda di e presidente for di sirkulashon. Trump no ta pordoná e votonan kontra di su leinan di parti di su mes partidarionan den Kongreso, kaminda e republikanonan tin un mayoria hopi pèrtá. Tampoko susesonan di pasado, manera e kongresistanan republikano ku a vota na fabor di su destitushon, durante su promé mandato.
Di e desena di asientonan estatal, òf nashonal, den wega di elekshonnan resien, e kandidatonan apoyá pa Trump a gana den kasi tur kaso. Na Indiana, kaminda Trump no a logra ku Kongreso estatal ta aprobá un reorganisashon di distrito nashonal, e presidente a tuma vengansa ku viktorianan den elekshonnan di kasi tur su aspirantenan. Den tur esaki a destaká e derota dje senador republikano pa Louisana, Bill Cassidy, un veterano ku den 2021 a vota pa baha Trump. E presidente a kobr’é esei ku elekshon di Julia Letlow, su rival, siman pasá.
Segun e senador republikano, Lindsey Graham, aliado, di Trump, e situashon ta bon kla: “Esnan ku purba na destruí Trump polítikamente, òf esnan ku ta blòkia e kaminda di su programa, lo pèrdè. Kisas bo no ta di akuerdo ku presidente Trump, pero si bo purba na kibr’é, bo ta bai pèrdè, pasobra esaki ta partido di Donald Trump”, segun el a agregá.
