Riba e foto: e enfermera Lucy Letby na momento di su aresto na su kas, na Chester, riba 3 di yüli 2018. E ta sintando kastigu di bida largu, sin posibilidat di suavisashon di kastigu.
LONDON, Gran Bretania (AFP).- Vários morto di beibinan resien nasí por a keda evitá si a apliká e normanan di seguridat, segun e konklushon di un investigashon publiká riba e kaso. E enfermera britániko Lucy Letby ta kumpli un kastigu di bida largu sin posibilidat di liberashon debí na asesinato di shete beibi i e intenshon pa a mata otro shete den su unidat di kuido intensivo di e hospital Cuntesss of Chester (nortwèst di Inglatera) entre 2015 i 2016.
Segun e akusashon, e tabata ataká su víktimanan, ku tabata beibinan prematuro i vulnerabel, durante di su wardanan di anochi, inyektando nan airu, kuminda di mas òf venená nan ku insulina. Despues dje kaso aki, ku a konmové Reino Uní, a krea un komité di investigashon dirigí pa e hues Kate Thirlwall. Despues di a eksaminá e akshonnan di e personal dje hospital, a konstatá ku tabatin atministrashon “disfunshonal” dje hospital i dje sistema di Servisio Nashonal di Salú, segun Thirwall den su informe.
Segun e hues Letby mester a keda apartá ora ku a surgi sospechonan ku e por ta kousando daño di forma intenshonal. Despues di un reunion riba morto di algun beibi den mei di 2016, Letby a sigui traha den e unidat. “E kos ei no mester a sosodé. E beibinan O i P no mester a muri”, segun Thirlwall, refiriendo na e dos último mortonan, ku a tuma lugá den yüli di 2016.
Despues di e delaster morto, “tabatin un tardansa largu” di komo un aña promé ku a envolví polis, segun e ta agregá. E hues a emití vários rekomendashon pa mehorá e protokòlnan di seguridat.
E informe ta rekomendá ku den un aña di tempu, tur e bòksnan inkubador di unidatnan neonatal mester ta ekipá ku kámaranan di video pa beibinan, di manera ku e mayornan por opservá nan yunan na kualke momento. Tambe e hues a sugirí pa hospitalnan instalá kámaranan di seguridat pa vigilá áreanan kaminda ta warda insulina den unidatnan neonatal.
