Hopi petishon pa karni i zeta di tribon den Corona

WILLEMSTAD.-Tribon tambe ta un piska ku na Kòrsou e poblashon ta kome ku smak. Un dushi karikari semper ta sabroso. Manera por a tuma nota riba website i Facebook di EXTRA grabashon di piskadónan lokal ku a logra gara tribon basta formal. Un di e piskadónan aki ta Kenrick “Kenchi” Berkemeijer i EXTRA a papia kuné. Mas tantu por tende ku ta den laman di nort piskadónan sa mira mas tantu tribon, pero den dianan tras di lomba a mira i piska algun tribon na kosta sùit tambe.

Piskadó Kenchi ta splika ku na kosta nort di Kòrsou hopi bia hendenan ta tira bestia morto manera kabai i baka i esei ta kuminda ku tribon ta reakshoná mesora riba dje. Den un di e tribonnan ku nan a piska resientemente nan a topa ku pia di kabai òf baka. Tribon ta yag den skol di masbangu, anchóvis i otronan. Den su naturalesa esei ta, pues no ta nada straño ku por topa ku tribon na kosta nort pero tambe na kosta sùit. Kenchi a duna di konosé ku mas tantu ta anochi nan ta piska tribon ya ku tribon ta bini mas serka di kosta den anochi. Ademas e kambio di klima tambe ta pone ku awendia tribonnan ta yega mas serka di kosta. Normalmente piskadónan ta piska tribon mas chikitu, pasobra e chikitu ta mas kaweta. Ta e tribon chikitu ta ataka mas lihé tambe, ounke den nos área nos no sa tende mes di atake di tribon. E último ta data di añanan 70. E rekomendashon na esnan ku ta snòrkel pa no spanta pa e situashon, keda alerta pero no drenta pániko pasobra e tribon ta sinti e vibrashon ei mesora. Tribon ta reakshoná hopi lihé riba holó, sigur si tin loke nan gusta ku ta kref i karkó.

Piskadónan ta kontentu ku a logra kue algun tribon, ounke algun dia a pasa pero te ainda hopi hende ta buska karikari i tur otro parti di e tribon. Nan ta produsiendo zeta di tribon loke tambe tin hopi pedido pe e dianan aki. E zeta di tribon ta masha bon mes pa hendenan ku ta sufri di Asma. Den paisnan asiátiko i tambe otro áreanan tin hopi interes pa fin di e tribon pa traha sòpi. Asiátikonan ta bisa ku e fin di e tribon ta yuda fantástiko kontra kanser. Un reakshon di Carmabi si nos no a logra apesar di nos esfuersonan. (file foto)

LAGA UN KOMENTARIO

Please enter your comment!
Please enter your name here