E potrèt aki ta mustra bomberonan den operashon pa mira kiko por salba di un sentro komersial ku a keda ataká pa Rusia komo parti dje invashon ruso.
KIEV, Ukrania (AFP).- Un atake ku drones ruso kontra di un sentral komersial di Krivoi Rog, den ost di Ukrania, a laga por lo ménos 15 morto i 130 herido den loke e presidente ukraniano, Volodimir Zelenski, ta kalifiká komo “síniko i despresiabel”.
E atake riba Krivoi Rog, siudat natal di Zelenski, a tuma lugá den pleno intensifikashon di e hostilidatnan riba siudatnan ukraniano di parti di Rusia. Otro kuater persona, entre nan tres menor di edat, a muri den otro bombardeo den e region di Nicolaiev, segun e Minister di Interior, IvanVigiuvski.
Videonan poné riba retnan sosial dje atake na Krivoi Rog a mustra trahadónan di reskate na kareda pa yuda heridonan riba kaya, miéntras ku un kolumna di huma ta sali for dje edifisio.
Un di dos drone a kai riba dak dje edifisio komo mei ora despues, den un atake ku segun Zelenski tabatin komo meta e ekiponan di emergensia”.,
Servisionan di emergensia ukraniano a indiká ku den e atake 15 persona a pèrdè nan bida i 130 otro a keda heridá, inkluso 13 mucha.
Zelenski a denunsiá riba X un “bombardeo di hende loko i despresiabel riba un sentro komersial” i a pidi un reakshon kontundente di parti di aliadonan di Ukrania.
“E atakenan aki no ta nada mas ku aktonan di terorismo. I mundu mester respondé riba esaki, poniendo un preshon real riba e agresor. Rusia mester para responsabel pa esaki”, el a bisa.
E paisnan aliado di Ukania tin intenshon pa reuní djaluna awor, ora ku ta selebrá e dia di independensia dje pais, pa reafirmá nan apoyo na Kiev.
E reunion di Koalishon di Boluntarionan ku ta ko-presidí pa e presidente franses Emmanuel Macron -ku lo partisipá den un videoconference – e hefe di gobièrnu áleman, Friedrich Merz, i e promé minister britániko, Andy Burnham.
Kuater aña i mei despues di inisio dje invashon ruso di Ukrania, e atakenan kada bes ta multipliká na tur dos banda dje frontera i ta alkansá un kantidat kada bes mas grandi di instalashonnan sivil, mientras ku e kantidat di víktimanan tambe ta sigui oumentá.
